2022 ජනවාරි මස 20 වන බ්රහස්පතින්දා
( තිළිණි ද සිල්වා සහ රංජන් කටුගම්පොළ )
කොළඹ වරාය නගර සංවර්ධන ව්‍යාපෘතියේ (පෝට් සිටි) ඉදිකිරීම් කටයුතු අත්හිටුවන සහ අවලංගු කරන ලෙස ඉල්ලා ගොනු කර ඇති රිට් පෙත්සමට එරෙහිව මූලික විරෝධතා තුනක් නීතිපතිවරයා විසින් අද (14) අභියාචනාධිකරණය හමුවෙහි ගොනු කළේය.
එම විරෝධතා පිළිගෙන මෙම පෙත්සම නිෂ්ප‍්‍රභ කරන ලෙසද නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් අර්ජුන ඔබේසේකර මහතා අධිකරණයෙන් ඉල්ලා සිටියේය.
අභියාචනාධිකරණ සභාපති විනිසුරු එල්.ටී.බී.දෙහිදෙණිය මහතා ඉදිරියේ මෙම පෙත්සම කැඳවූ අවස්ථාවේදී නීතිපතිවරයා ඇතුළු රජයේ පාර්ශවයේ කිහිප දෙනකු වෙනුවෙන් පෙනී සිටි නියෝජ්‍ය සොලිසිටර් ජනරාල් අර්ජුන ඔබේසේකර මහතා මෙම මූලික විරෝධතා ඉදිරිපත් කළේය.
නියෝජ්‍ය සොලිසිටර් ජනරාල්වරයා මෙම මූලික විරෝධතා ගොනු කරනු ලැබුවේ කොළඹ වරාය නගර ව්‍යාපෘතියට එරෙහිව පාරිසරික යුක්ති කේන්ද්‍රය විසින් ගොනු කර තිබූ රිට් පෙත්සම අද කැඳවූ අවස්ථාවේදීය.
මෙම පෙත්සම මඟින් අවශ්‍ය පාර්ශවයන් වගඋත්තරකරුවන් ලෙස නම් කර නැති බව පළමුවැනි මූලික විරෝධතාවය ලෙස මෙහිදී ඉදිරිපත් විණි.එසේම අදාළ ව්‍යාපෘතිය ක්‍රියාත්මක කර බොහෝ කාලයක් ඉක්මවා ඇති බැවින් දැන් මෙවැනි පෙත්සමක් ඉදිරිපත් කළ නොහැකි බව දෙවැනි විරෝධතාවය විය.
එසේම එම ව්‍යාපෘතිය සම්බන්ධයෙන් ඉදිරිපත් කර ඇති පාරිසරික ඇගයුම් වාර්තාවේ පාර්ශවයන්ට විරෝධතා ගොනු කිරීමට පෙත්සම්කාර පාර්ශවය කටයුතු නොකිරීම යන්න නීතිපතිවරයා විසින් ඉදිරිපත් කළ තෙවැනි විරෝධතාවය විණි.
මෙම විරෝධතාවන් පිළිබඳ කරුනු වැඩිදුර සලකා බැලීම ලබන අගෝස්තු 08 වැනිදා සිදු කිරීමට අභියාචනාධිකරණය තීන්දු කළ අතර ඒ සම්බන්ධ ප‍්‍රතිවිරෝධතා ගොනු කිරීම එදින සිදුකරන ලෙසද අධිකරණය පෙත්සම්කාර පාර්ශවයට නියම කළේය.
