( තිළිණි ද සිල්වා )

ශ්‍රී ලංකාවේ ජනවාර්ගික ප‍්‍රශ්නයක් නොමැති බවත්, පවතින්නේ ජාතිවාදී උගතුන් නිර්මාණය කළ ව්‍යාජ ඉතිහාසය කේන්ද්‍රීය කර ගත්  ප‍්‍රශ්නයක් යැයි රජරට විශ්වවිද්‍යාලයේ වෛද්‍ය පීඨයේ මහාචාර්ය චන්න ජයසුමන මහතා ස්විට්සර්ලන්තයේ ජිනීවා එක්සත් ජාතීන්ගේ මානව හිමිකම් කවුන්සිලයේදී  (18) පැවසීය.

එම කවුන්සිලයේ 39 වැනි සැසියේදී ජගත් දේශපේ‍්‍රමී ලාංකික සංසදය නියෝජනය කරමින් වෛද්‍ය චන්න ජයසුමන මහතා මෙම අදහස් දැක්වීය.

එහිදී සැසියේ සාමාජික රටවල් හි නියෝජිතයින් අමතමින් මහාචාර්යවරයා පෙන්වා දුන්නේ ලංකාව සම්බන්ධයෙන් දෙමළ ජාතිවාදීන් නිර්මාණය කර ඇති මිත්‍යා ඉතිහාසය සියලූ ශ්‍රී ලාංකිකයන්ගේ මානව හිමිකම් කඩ කර ඇති බවය.

මහාචාර්ය චන්න ජයසුමන මහතා මෙසේද කීය.

    ‘‘1815 දී ලංකාවේ පාලන බලය හිමිකරගත් ඉංග‍්‍රීසීන් වෙල්ලාල දෙමළ ජනතාවට සෙසු ජන කොටස්වලට වඩා ප‍්‍රමුඛතාවක් ලබා දුන්හ. 1833 පළමු ව්‍යවස්ථාදායක සභාව පිහිටුවන විට රටේ ඉතිහාසය ගැන හෝ ජන කොටස්වල සංයුතිය ගැන කිසිදු තැකීමක් නොකළ ඉංග‍්‍රීසීන්  සිංහල, දෙමළ, බර්ගර් ජනයා වෙනුවෙන් එක නියෝජිතයකු බැගින් පත් කළේය. එවකට වසර දෙදහසකට වඩා ඉතිහාසයක් පැවති රටේ ජාතිය, භාෂාව,සංස්කෘතිය නිර්මාණය කළ මුළු ජනගහනයෙන් සියයට 75 නියෝජනය කළ සිංහලයන්ට මෙන්ම එවකට වසර 200 ක ඉතිහාසයක්වත් නොපැවති මුළු ජනගහනයෙන් සියයට 10 වත් නොවූ දෙමළ ජනතාව ව්‍යස්ථාදායක සභාව තුළ සම නියෝජනයක් ලබා දීම කිසිදු ප‍්‍රජාතන්ත‍්‍රවාදී මූලධර්මයකට අනුකූල නොවේ.

බි‍්‍රතාන්‍ය පාලකයන්ගේ ආශීර්වාදය ලැබූ දෙමළ වෙල්ලාල නායකයන්ට අවශ්‍ය වූයේ මුළු රටේම නායකයන් වීමටයි. කෙසේ නමුත් 1931 වසරේදී සර්වජන ඡන්ද බලය හඳුන්වා දීමත් සමග මුළු රටේම නායකයන් වීමට නොහැකි බව වෙල්ලාල නායකයෝ අවබෝධ කර ගත්හ.

මේ නිසා අඩුම තරමේ දිවයිනේ උතුරු සහ නැගෙනහිර පළාත්වල පාලකයන් බවට පත් වීමට ඔවුන්ට අවශ්‍ය වූවා. බෙදුම්වාදී ව්‍යාපාරයේ ආරම්භය මෙයයි. දෙමළ බෙදුම්වාදී ව්‍යාපාරයේ ආරම්භය සිදු වූයේ දෙමළ ජනතාවට ශ්‍රී ලංකාව තුළ කිසිදු අසාධාරණයක් සිදු වීම නොව දෙමළ වෙල්ලාල ජනතාවට මුළු රටේම නායකයන් වීමට නොහැකි වීම හේතුවෙනි.

2009 වසරේදී මුළුමහත් දෙමළ ජාතිවාදී ව්‍යපාරයම නන්දිකඩාල්හිදී යුදමය වශයෙන් පරාජය කිරීම ඒ සඳහා ලබා දුන් දේශපාලන විසදුම ද වේ. එහෙයින් තවදුරටත් විසඳුමක් ගැන කතා කිරීම අනර්ථකාරීය.ලංකාවේ සැබෑ ඉතිහාසය අධ්‍යනයෙන් පෙනී යන්නේ ශ්‍රී ලංකාව තුළ ජනවාර්ගික ප‍්‍රශ්නයක් නැති බව යැයිද වෛද්‍ය චන්න ජයසුමන මහතා කීය.

ජගත් දේශපේ‍්‍රමී ලාංකික සංසදය වෙනුවෙන් මෙවර 39වන ජිනීවා මානව හිමිකම් සැසිවාරයට මහාචාර්ය චන්න ජයසුමන ,  රියර් අද්මිරාල් ආචාර්ය සරත් වීරසේකර මහතා ජගත් දේශපේ‍්‍රමී ලාංකික සංසදයේ සභාපති වසන්ත කීර්තිරත්න, ආචාර්ය වර්ණ හෙට්ටිආරච්චි,  ඉන්දික ගුණසේකර, මැනික් මාලියද්ද,ලක්ශ්මන් බාන්ස් සහ දුශාන්ති හපුගොඩ, ඇතුළු විධායක සභිකයින් පිරිසක් සහභාගී වෙති.

මොවූහූ ලංකාවේ යුද අපරාධ සම්බන්ධයෙන් ප‍්‍රධාන සමුළුවට හා අතුරු සම්මන්ත‍්‍රණ තුනක් සඳහා සහභාගී වීමට නියමිතය.සැසිය ලබන 28 වැනිදායින් අවසන් වේ.