( කේ බුද්ධික කුමාරසිරි )

හෝමාගම - මොරගහහේන මාර්ගයේ පිටිපන හල්ගහදෙනිය ප‍්‍රදේශයේදී අද (24)  යතුරුපැදියක් සහ වෑන් රථයක් මුහුණට මුහුණ ගැටීමෙන් සිදු වූ අනතුරින් බරපතල තුවාල ලැබූ යතුරුපැදියෙහි ගමන් ගත් තරුණයින් දෙදෙනෙකු හෝමාගම මූලික රෝහලට ඇතුළත් කිරීමෙන් පසු  එක් තරුනයෙකු මිය ගොස් ඇතැයි හෝමාගම පොලිසිය පවසයි

තුවාල ලබා රෝහලට ඇතුළත් කරන ලද අනෙක් තරුණයාද බරපතල තත්වයෙන් රෝහලේ ප‍්‍රතිකාර ලබන බවත් පොලිසිය පවසයි

මිය ගිය තරුණයා තවත් මිතුරෙකු සමග හෝමාගම ප‍්‍රදේශයට පැමිණ යළි නිවස බලා යාමේදී අනතුර සිදු වූ පිටිපන, හල්ගහදෙනිය ප‍්‍රදේශයේදී එම දෙසටම ගමන් ගත් ති‍්‍ර රෝද රථයකට ඉස්සර කිරීමට යාමේදී තලගල දෙස සිට ඉදිරියෙන් පැමිණි වෑන් රථයේ ගැටී අනතුර සිදුව ඇතැයි කළ මූලික විමර්ශණයේදී අනාවරණය වූ බවද පොලිසිය පවසයි.

අනතුරට ලක් වූ තරුණයින් සාදයක් පවත්වා ඒ සදහා තවත් අවශ්‍ය වූ ද්‍රව්‍ය කිහිපයක් රැගෙන ඒම සදහා හෝමාගම ගොස් නැවත පැමිණෙමින් සිටියදී මෙම අනතුර සිදුව ඇති බවත් අනතුර සිදුවන අවස්තාවේදී යතුරුපැදියෙහි ගමන් ගත් තරුණයින් දෙදෙනාම ආරක්ෂිත හිස් ආවරණ පැළඳ නොගෙන ගමන් කර ඇති බවත් එම දෙදෙනාම මත්පැන් පානය කර ඇති බවට සැක කල හැකි සාක්ෂි හමු වී ඇති බවද හෝමාගම පොලිසියේ උසස් නිලධාරියෙකු පැවසීය

මෙලෙස මිය ගොස් ඇත්තේ වැළිමඩ, පේරවැල්ල වැරැල්ලන්ද ප‍්‍රදේශයේ පදිංචිකරුවකු වන රත්නායක මුදියන්සේලාගේ දර්ශණ නිවන්තක නමැති 30 හැවිරිදි අවිවාහක තරුණයෙකි.

ඔහු මෝටර් කාර්මිකයෙකු ලෙස රැකියාව කරමින් මොරගහහේන බෙරුකැටිය ප‍්‍රදේශයේ ඥාති නිවසක පදිංචිව සිට ඇති බවද පොලිසිය පවසයි.