(මනෝප‍්‍රිය ගුණසේකර සහ රන්ජන් කටුගම්පොළ)

කොල්ලූපිටියේ ‘මොනෑක් එපාර්ට්මන්ට්‘හි නිවස මුලින් බදු ගැනීම හා පසුව මිලට ගැනීම පිළිබඳව තමා කිසිවක් නොදන්නා බවත් එම නිවස මිලට ගැනීමට කටයුතු කර ඇත්තේ තම බිරිඳ හා වැඩිමහල් දියණිය අධ්‍යක්‍ෂධුර දරන සමාගමෙන් යැයි විදේශ කටයුතු අමාත්‍ය රවී කරුණානායක මහතා බැඳුම්කර කොමිසම හමුවේ අද (02) පැවසීය.

එම නිවස ගැන තමා මුලින්ම දැනගත්තේ බද්දට ගත් එම නිවසේ පදිංචියට ගිය දිනයේ දී යැයිද කී  කරුණානායක මහතා තමා බිරිඳ හා දියණියන් තිදෙනා සමඟ හොඳ පවුල් ජීවීතයක් ගත කළත් සෑම තොරතුරක්ම තමන්ට දැනුම් දෙන්නේ නැතැයිද වැඩිදුරටත් කීය.

කොමිසමෙන් දැනුම් දීම් කළ තුන්වැනි දිනයේදී කොමිසම හමුවේ පෙනී සිටි විදේශ කටයුතු අමාත්‍ය රවී කරුණානායක මහතාගෙන් පැය 4 1/2 ක පමණ කාලයක් පුරා ඔහුගෙන් සාක්කි විමසීය.

 කොමිසමේ සාක්කි කූඩුවට ගොඩ වු විගස කොමසාරිස්වරුන්ට ‘සුභ උදෑසනක්’ ප්‍රාර්ථනා කළ  කරුණානායක මහතා මීට පෙර කොමිසමෙන් කළ දැනුම් දීමට අනුව කොමිසම හමුවේ පෙනී සිටීමට නොහැකි වීම සම්බන්ධයෙන් කොමිසමෙන් සමාව ඇයැද සිටියේය.

ඒ අවස්ථාවේදී කරුණානායක මහතා ඇමතූ කොමිසමේ සභාපති විනිසුරු කේ.ටී. චිත‍්‍රසිරි මහතා ඔබගේ නීතීඥවරයා කොමිසම හමුවේ පෙනී සිටිමින් ඔබට ඇති අපහසුතාවය දැනුම් දුන්නේ යැයි කීය.

අර්ජුන් ඇලෝසියස් මහතාගේ ජංගම දුරකථනයට අදාළව ලබාගත් ඩිජිටල් වෝහාරික පරීක්‍ෂණ වාර්තාවේ රවී කරුණානායක මහතාට අදාළ කොටස කොමිසමට ඉදිරිපත් කරමින් ‘ගරු රවී’ සහ ‘ආර්.කේ.’ යනුවෙන් සඳහන් කරමින් යවනු ලැබු එස්.එම්.එස්. පණිවුඩ ගැන කරුණානායක මහතාගේ අවධානය යොමු කරනු ලැබුවත් ඒ පිළිබඳ කිසිවක් තමා නොදන්නේ යැයි පැවසීය.

අර්ජුන් ඇලෝසියස් සහ අර්ජුන් ඇලෝසියස් එක හා සමාන කාල පරාසයක් තුළ අවස්ථා 13කදී සිංගප්පුරූ ගිය බවටද එක් අවස්ථාවකදී අමාත්‍ය රවී කරුණානායක මහතා සහ අර්ජුන් ඇලෝසියස් එකම දින එකම ගුවන් යානයකින් සිංගප්පුරූ ගිය බවටද පැමිණිල්ල වෙනුවෙන් පෙනී සිටින අතිරේක සොලිස්ටර් ජනරාල් ජනාධිපති නීතීඥ දප්පුල ද ලිවේරා මහතා වාර්තා පෙන්නුවේය.

තමාගේ මතකයට අනුව අර්ජුන් ඇලෝසියස් සිංගප්පුරූවේදී හමුවුයේ එක් අවස්ථාවකදී පමණක් යැයි කී කරුණානායක මහතා අර්ජුන් ඇලෝසියස්ගේ සීයාගේ කාලයේ සිට ඔහුගේ පරම්පරාවේ අය දන්නා නමුත් අර්ජුන් ඇලෝසියස් සමඟ පෞද්ගලික හෝ ව්‍යාපාරික සම්බන්ධතා පවත්වන්නේ නැතැයි වැඩිදුරටත් කොමිසම හමුවේ පැවසීය.

මේ අතර කොමිසමේ සාමාජික විනිසුරු ප‍්‍රසන්න ජයවර්ධන මහතා අමාත්‍ය රවී කරුණානායක මහතා අමතමින් මේ සියල්ලටම තමන්ගේ පිළිතුර වන්නේ ‘මා කිසිවක් දන්නේ නැහැ’ නේදැයි විමසු විට ඊට ‘ඔව්’ යනුවෙන් අමාත්‍ය රවී කරුණානායක මහතා පිළිතුරු දුන්නේය.