2022 ජනවාරි මස 20 වන බ්රහස්පතින්දා
(ඩයනා උදයංගනී)
රජය මාධ්‍යවේදීන්ට නීති හෝ ආචාරධර්ම පැනවීමට පියවර නොගන්නා නමුත් ස්වයංව නීති රීති පනවාගෙන ජනතාවට සත්‍ය තොරතුරු ලබාදීමේ වගකීමක් මාධ්‍යවලට තිබෙන බව මුදල් හා ජනමාධ්‍ය අමාත්‍ය මංගල සමරවීර මහතා පවසයි.
ආණ්ඩුවේත් වංචා දූෂණ හෙළිදරව් කිරීම මාධ්‍ය විසින් කළ යුතු බව කී අමාත්‍යවරයා එසේ වුවත් ජනාධිපතිතුමා විසින් අලූත් ශ්‍රී ලංකාවක් ගොඩනැගීමේ අත්තිවාරම දමා ඇති ප‍්‍රජාතන්ත‍්‍රවාදීකරණය, සංහිඳියාව හා සංවර්ධනය යන කුළුණු තුනට හානිවන ආකාරයේ ප‍්‍රවෘත්ති කලාවකට නොයන නව මාධ්‍ය සංස්කෘතියක් බිහිවිය යුතු බව ද අමාත්‍යවරයා ප්‍රකාශ කරයි.
ඇතැම් සමාජ ජාලා වෙබ් අඩවි හා සමහර පුවත්පත් අසත්‍ය ප‍්‍රවෘත්ති නිෂ්පාදනය කිරීමේ කර්මාන්තශාලා බවට පත්ව ඇතැයි ද අමාත්‍යවරයා කියයි.
අමාත්‍යවරයා මේ බව පැවසුවේ ශ්‍රී ලංකා පුවත්පත් මණ්ඩලය මගින් පැවැත්වූ ‘පුවත්පත් කලාව හා සන්නිවේදන අධ්‍යයනය‘ පාඨමාලාව හැදෑරූවන් 22 දෙනෙකුට ඩිප්ලෝමා සහතිකපත් ප‍්‍රදානය කිරීමේ උත්සවයට එක්වෙමිනි. ජනාධිපති මෛත‍්‍රීපාල සිරිසේන මහතාගේ ප‍්‍රධානත්වයෙන් කොළඹ, බණ්ඩාරනායක අනුස්මරණ ජාත්‍යන්තර සම්මන්ත‍්‍රණ ශාලා පරිශ‍්‍රයේදී අද (02) මෙම උත්සවය පැවැත්විණි.
