(විනීතා එම් ගමගේ)

විදේශ ගතවී සිටින තම බිරිඳ කරදරයට පත්ව සිටින බැවින්  ඇය මෙරටට ගෙන්වා ගැනීමට විදේශ සේවා නියුක්ති කාර්යාංශයට ලක්ෂ හතරක් ගෙවීමට ඇති බව කියමින් බස්වලට නැග මුදල් එකතු කරමින් සිටි සංවිධානාත්මක කණ්ඩායමක් අත්අඩංගුවට ගත් බව විදේශ සේවා නියුක්ති කාර්යාංශය කියයි.

කොළඹ සිට බලංගොඩ දක්වා දිවෙන මගී ප‍්‍රවාහන බස්රථය තුළ ඉකුත් 13 වැනි දා හංවැල්ල ප‍්‍රදේශයේදී පුද්ගලයකු මගීන්ගෙන් මුදල් එකතු කර ඇති අතර එම අවස්ථාවේ කි‍්‍රයාත්මක වූ එම කාර්යංශයේ විශේෂ විමර්ශන අංශයේ නිළධාරීන් එම බස් රථය නවතා අදාළ පුද්ගලයා අත්අඩංගුවට ගෙන තිබේ.
 
ඔහුගේ බිරිඳ විදේශ ගත වී නොමැති බවත් මෙලෙස ව්‍යාජ තොරතුරු සපයමින් වසර ගණනාවක සිට යාචකයෙකු ලෙස සිඟමනේ යෙදෙන බවත් ප්‍රශ්න කිරීම්වලදී හෙළි වී තිබේ.

ඔහු දිනකට රුපියල් 4000ක් පමණ එකතු කර ගන්නා බවත් එම මුදල් මත්ද්‍රව්‍ය භාවිතයට යොදා ගන්නා බවත් අනාවරණය වීයැයි එම කාර්යංශය කියයි.  

මෙලෙස විදේශ ගතවී සිටින කාන්තාවන් ගෙන්වා ගැනීමට මුදල් අවශ්‍ය බව පවසමින් මොහු යටතේ තවත් කණඩායමක් සිඟමනේ යෙදෙන බවත් අනාවරණය වී තිබේ.
 
මෙවන් පුද්ගලයින්ට නොරැවටෙන ලෙසත් යම්කිසි පුද්ගලයකු රැකියාවකට විදේශ ගත වී යම් කරදරයකට මුහුණ දී ඇත්නම් එම පුද්ගලයා ගෙන්වා ගැනීමට අවශ්‍ය පහසුකම් විදේශ සේවා නියුක්ති කාර්යාංශය මගින් සලසන බවත් විදේශ රැකියා ඇමතිනී තලතා අතුකෝරල මහත්මිය පවසයි.

මෙවන් පුද්ගලයින් ගැන එම විශේෂ විමර්ශන ඒකකය දැනුම්වත් කරන ලෙසත් අමාත්‍යතුමිය ඉල්ලයි.