(තිළිණි ද සිල්වා)

නිල සංචාරයක් සඳහා දිවයිනට පැමිණීමට නියමිතව තිබූ බ්‍රිතාන්‍ය විදේශ කටයුතු හා පොදුරාජ්‍ය මණ්ඩල කාර්යාල කටයුතු පිළිබඳ අමාත්‍ය ආලෝක් ෂර්මා මහතා එම සංචාරය අත්හිටවූ බව ශ්‍රී ලංකාවේ බ්‍රිතාන්‍ය මහකොමසාරිස් කාර්යාලය පවසයි.

බ්‍රිතාන්‍ය  අගමැතිනී තෙරේසා මේ මහත්මිය විසින් බ්‍රිතාන්‍ය තුළ හදිසි මැතිවරණයක් ප‍්‍රකාශයට පත් කිරීමත් සමඟ අමාත්‍ය අලෝක් ෂර්මා මහතාගේ  ශ්‍රී ලංකා සංචාරය අත්හිටවූ බව ද එම මහකොමසාරිස් කාර්යාලය කියා සිටී.

මෙරට තෙදින නිල සංචාරයක් සඳහා බ්‍රිතාන්‍ය විදේශ කටයුතු හා පොදුරාජ්‍ය මණ්ඩල කාර්යාල කටයුතු පිළිබඳ අමාත්‍යවරයා බ්‍රහස්පතින්දා(20) දිවයිනට පැමිණීමට නියමිතව තිබිණි. ලබන සෙනසුරාදා (22) තෙක් මෙරට රැඳී සිටීමට නියමිතව තිබූ හෙතෙම එම කාලය තුළ රජයේ නියෝජිතයින් පිරිසක් හමුවීමට යොදාගෙන තිබුණි.

තවද හෙතෙමෙ කොළඹ හෝර්ටන් පෙදෙසේ ලක්ෂ්මන් කදිරගාමර් ජාත්‍යන්තර සබඳතා ආයතනය විසින් සංවිධානය කර තිබූ බ්‍රිතාන්‍ය බ්‍රික්සිට් ගිවිසුමෙන් ඇති වූ අවස්ථා සහ අභියෝග මැයෙන් දේශනයක් පැවැත්වීමට සූදානමින් සිටියේය.