(ඉන්දිකා රාමනායක)

බීමත් රියදුරන් අත්අඩංගුවට ගැනීම සදහා  රට පුරා කි‍්‍රයාත්මක කළ මෙහෙයුමේ දී මාස දෙකකට ආසන්න තුළ අත්අඩංගුවට ගත් රියදුරන් අධිකරණයට ඉදිරිපත්  කිරීමෙන්  දඩ මුදල් වශයෙන් රුපියල් කෝටි 30  ට අධික  මුදලක් රජයට උපයා දී ඇති බව රථවාහන පොලිසිය කියයි.


ඉකුත් ජුලි මස 5 වැනි  සිට අගෝස්තු මස 3  වැනි දින දක්වා කි‍්‍රයාත්මක කළ  මෙම මෙහෙයුමේ දී බීමත් රියදුරන් 12,199 දෙනෙකු අත්අඩංගුවට ගෙන ඇති අතර ඔවුන් අධිකරණයට ඉදිරිපත් කරමින් මෙම මුදල්  උපයාගෙන ඇති බව රථවාහන පාලන හා මාර්ග ආරක්ෂාව බාර අධ්‍යක්ෂ  පොලිස් අධිකාරි ඉන්දික හපුගොඩ මහතා පවසයි.


මෙම මෙහෙයුමේ දී වැඩිම බීමත් රියදුරන්  පිරිසක් අත්අඩංගුවට ගෙන ඇත්තේ කොළඹ ප‍්‍රදේශයේ බවත්  එම පිරිස අතර 617 දෙනෙකු සිටින බව ද ඒ මහතා පවසයි.
 
සෙසු වැඩිම ප‍්‍රදේශ  වු ගල්කිස්ස,  මාතර,  තංගල්ල, රත්නපුර,  මහනුවර, අනුරාධපුරය,  බිමත් රියදුරන් 500 ට වැඩි පිරිසක් අත්අඩංගුවට ගෙන ඇති බවද ඒ මහතා පැවසීය.
 
මේ අතර  වැඩි  පිරිසක්  ති‍්‍රරෝද රථ රියදුරන් හා   යතුරුපැදිකරුවන්  බවද   පොලිසිය පවසයි. බීමත් රියදුරන් අතින් සිදුවන අනතුරු අවම කර ගැනීම සදහා මෙම මෙහෙයුම් අඛණ්ඩව තවදුරටත් කි‍්‍රයාත්මක කෙරේ.