ප්‍රසාද් රුක්මාල්

පළාත් පාලන මැතිවරණයේ එක්සත් ජාතික පක්ෂයට බලය හිමිව තිබූ බදුල්ල මහනගර සභාව අද (28) පොදුජන පෙරමුණේ ප්‍රියන්ත අමරසිරි මහතා නගරාධිපති ලෙස විවෘත ඡන්දයෙන් තේරිපත් විය.

එක්සත් ජනතා නිදහස් සන්ධානයේ මන්ත්‍රී රංගේ අසිත නලින්ද මහතා නියෝජ්‍ය නගරාධිපති ලෙස තේරිපත් විය.

බදුල්ල මහනගර සභා රැස්වීම් ශාලාවේදී මෙම රැස්වීම්  පළාත් පාලන කොමසාරිස් මංගල රංදෙණිය මහතාගේ ප්‍රධානත්වයෙන්  පැවැත්විණි.

නගරාධිපති තනතුර සඳහා බදුල්ල මහනගර සභාවේ හිටපු නගරාධිපතිවරයකු,මෙන්ම හිටපු විපක්ෂ නායකයා වූ ඇම්.ඩී.ඒ.හේමචන්ද්‍ර මහතාගේ නම යෝජනා වූ අතර ඡන්දය විමසීමේදී ඔහුට ඡන්ද 9ක් ලැබුණු  අතර ,නගරාධිපති වූ ප්‍රියන්ත අමරසිරි මහතා ඡන්ද 12ක් ලබාගත්තේය.

නියෝජ්‍ය නගරාධිපති තනතුර සදහා එක්සත් ජාතික පක්ෂයේ  ජේ.ඇම්. අසාර් මහතාගේ නම යෝජනා වු අතර ඔහුට ඡන්ද 9ක් ද නියෝජ්‍ය නගරාධිපති වු  එක්සත්  ජනතා  නිදහස් සන්ධානයේ රංගේ අසිත නලින්ද මහතා ඡන්ද 12ක් ලැබිණි.

ජනතා විමුක්ති පෙරමුණේ මන්ත්‍රිවරු තිදෙනා ඡන්දය දීමෙන් වැළකී සිටියේය.

බදුල්ල මහ නගර සභාව සඳහා ජනතා විමුක්ති පෙරමුණ මන්ත්‍රී 3 ක්, එජාප මන්ත්‍රී 9ක්, එජනිස 5ක්,පොහොට්ටුව 8ක් වශයෙන් මන්ත්‍රිවරු 25ක් තේරි පත්ව සිටිති.