( තිළිණි ද සිල්වා සහ රංජන් කටුගම්පොළ )

මාතර මූලස්ථාන පොලිසියට ගිය නීතීඥවරියකට එම පොලිස් ස්ථානයේ අපරාධ අංශයේ හිටපු ස්ථානාධිපතිවරයා බැනවැදී අමානුෂික ලෙස බැන සැලකීමෙන් ඇගේ මූලික අයිතිවාසිකම් උල්ලංඝනය වී ඇති බවට තීන්දු කළ ශ්‍රේෂ්ඨාධිකරණය ඒ වෙනුවෙන් ඇයට රුපියල් ලක්ෂයක වන්දි මුදලක් ගෙවන ලෙස එම පොලිස් නිලධාරියාට අද (28) නියෝග කළේය.

2013 වසරේදී පොලීසියට අවශ්‍යව සිටි බව කියන සිය සේවාදායකයෙකු සමඟ මාතර මූලස්ථාන පොලීසියට ගිය නීතීඥවරියකට එලෙස බැන වැදී තිබූ බව කියැවේ.

එම වන්දි මුදල පෞද්ගලික මුදලින් මාස හයකදී ගෙවන ලෙසද ශ්‍රේෂ්ඨාධිකරණය  පොලීසියේ අපරාධ අංශයේ හිටපු ස්ථානාධිපති වසන්ත කුමාර නැමැත්තාට නියම කරන ලදී.

එම පොලිස් ස්ථානයේ අපරාධ අංශයේ හිටපු ස්ථානාධිපතිවරයා ඇතුළු පස් දෙනකුට එරෙහිව නීතීඥ රාජිකා ප‍්‍රසාදිනී විජේතුංග මහත්මිය විසින් ගොනු කරනු ලැබූ මූලික අයිතිවාසිකම් පෙත්සමක් සම්බන්ධ නියෝගය අද (28) විවෘත අධිකරණය හමුවේ ප‍්‍රකාශ කරමින් ශ්‍රේෂ්ඨාධිකරණය මෙලෙස නියම කළේය.