(නිමල කොඩිතුවක්කු)

වාහන තදබදය අවම කිරීමේ අරමුණින් කොළඹ නගරයේ ක්‍රියාත්මක ප්‍රමුඛතා මන්තීරු ලබාදීමේ වැඩපිළිවෙළේ දෙවන අදියර  බොරැල්ල සිට පිටකොටුව දක්වා ක්‍රියාත්මක කරන බව මගී ප්‍රවාහන කළමනාකරණ සහ විදුලිබල බලශක්ති අමාත්‍ය මහින්ද අමරවීර මහතා පැවැසීය.

ලබන 22 දා සිට බොරැල්ලේ සිට පිටකොටුව දක්වා ප්‍රමුඛතා මං තීරුව  ක්‍රියාත්මක කරන බවද අමාත්‍යවරයා සඳහන් කළේය.

ප්‍රවාහන කළමණාකරන සහ විදුලිබල බලශක්ති අමාත්‍ය මහින්ද අමරවීර මහතාගේ ප්‍රධානත්වයෙන් කොළඹ  මල්පාරේ ඛනිජ තෙල් අමාත්‍යංශ ශ්‍රවණාගාරයේ දී අද(17) පැවති මාධ්‍ය හමුවකදී අමාත්‍යවරයා මේ බව පැවසීය.

ප්‍රමුඛතා මංතීරු සැකසීමේ පළමු අදියර මොරටුව කුරුස හංදිය සිට පිටකොටුව දක්වා ක්‍රියාත්මක කළ අතර ඒ තුළින් වාහන වල ධාවන කාලය විනාඩි 30 සිට 44 දක්වා අවම කිරීමට හැකිවූ බවද අමාත්‍යරයා සදහන් කළේය.

මගී ප්‍රවාහන කළමනාකරණ අමාත්‍යාංශය, පොලීසිය සහ ජාතික ගමනාගමන කොමිෂන් සභාව එක්ව මෙම ප්‍රමුඛතා මංතීරු වැඩසටහන ක්‍රියාත්මක කරනු ලබයි.