(විනීතා එම් ගමගේ)

අනාගතය ගැන අවධානය නිසි ලෙස යොමු නොවූ භයානක අවස්ථාවක රටේ ආර්ථිකය පවතින්නේ යැයි මහජන බැංකුවේ හිටපු සභාපති රුසිරුපාල තෙන්නකෝන් මහතා ප‍්‍රකාශ කළේය.

රටේ මුදල් සංචිත අවභාවිතා කිරීම හා වැටෙන්නට ඉඩදීමේ ප‍්‍රථිපලයක් ලෙස මේ තත්ත්වය ඇති වී ඇතැයි කී තෙන්නකෝන් මහතා රටේ තිබු මුදල් සංචිත 2016 අවසානය වනවිට ප‍්‍රබල ලෙස ක්ෂය වීමට පටන් ගත්තේ යැයි ද සඳහන් කළේය.

රාජ්‍ය ආදායමෙන් සියයට 91 ක් වක‍්‍ර හා ඍජු බදුයි. වෙන ආදායමක් නැහැ. එයින් සියයට 83 කට වැඩි ප‍්‍රමාණයක් වක‍්‍ර බදු ගෙවන සාමාන්‍ය ජනතාවගෙන් අය කරන බදු යැයි ද හෙතෙම පැවැසීය. 

අද ලෝකයේ ඇති වන හෙම්බිරිස්සාවකට වත් මුහුණ දෙන්න අපේ රටට හැකියාව නැතැයි පැවසූ තෙන්නකෝන් මහතා ඩොලරයේ  නැගීම තුළ බොහෝ රටවල් ඒකට මුහුණ දීමට ආර්ථික පසුබිම හදාගෙන ඇතත් අපේ රටේ එසේ හදා නොගත් නිසා මේ තත්ත්වයට පත්වුණේ යැයි ද කීය.  වහාම මේ අයගෙන් ආර්ථිකය වහාම ගලවා නොගත්තොත් ජනතාව ඉතා ඉක්මනින් විශාල ප‍්‍රශ්න රැසකට මුහුණ දෙන්නට  සිදුවන බව ද ඔහු කීය.

අද සිදුවන්නේ සංවර්ධන කටයුතු දෙකක් පමණක් බවත්  ඒ වරාය නගරය  හා මෙගා පොලිස් යන ව්‍යාපෘති දෙක පමණක් බවත් හෙතෙම කියා සිටියේය.  

රටේ වහාම පාලනයේ වෙනසක් ඇති විය යුතුයැයි පැවසූ ඒ මහතා  ජනතාවට ඇති කරල තියෙන විනාශය වහා මඟහැරවිය යුතු යැයි ද පැවසීය.  

මේ ආණ්ඩුව යන යකා කොරහත් බිඳගෙන යන්න යනවා වගේ පෙනෙන බවත් නිවැරදි ලෙස කි‍්‍රයාත්මක කර හැකි ආර්ථික පිළිවෙතක් සුරංගනා ලෝකවලින් බැහැරව ආරම්භ කළ යුතුයි බවත් රුසිරුපාල තෙන්නකෝන් මහතා කියා සිටියේය.

තෙන්නකෝන් මහතා මේ අදහස් පළ කළේ ශ්‍රී ලංකා මානව හිමිකම් කෙන්ද්‍රයේ අද  (03) පැවති මාධ්‍ය හමුවක අදහස් දක්වමිනි. එම කේන්ද්‍රයේ අධ්‍යක්ෂ රජිත් කීර්ති තෙන්නකෝන් මහතා ද අදහස් දැක්වීය