බිඟුන් මේනක ගමගේ 
 
තොරතුරු කොමිසමේ නියෝග නොපිළිපදින ආයතන සම්බන්ධයෙන් මෙතෙක් ලිහිල් ප්‍රතිපත්තියක් අනුගමනය කළ නමුත් ලබන වසරේ සිට එවැනි ආයතනවලට එරෙහිව අධිකරණමය ක්‍රියාමාර්ගවලට අවතීර්ණ වන්නේ යැයි එහි අධ්‍යක්ෂ ජනරාල් පියතිස්ස රණසිංහ මහතා කොළඹ ජානකී හෝටලයේ පැවැති වැඩමුළුවකදී පැවැසීය.
 
කොමිසම නඩුවක් විභාග කරද්දී ඊට පෙනී නොසිටීමත් දුන් නියෝග ක්‍රියාත්මක නොකිරීමත් දෑවුරුද්දක සිර දඬුවමකට හා රුපියල් පනස් දහසක දඩයකට යටත් කළ හැකි වරදක් යැයි ද රණසිංහ මහතා කීවේය.
 
හැකි තරම් තොරතුරු දැනගැනීමේ අයැදුම්පත් පොදු අධිකාරින්ට යොමු කරන්නැයි ජනතාවගෙන් තමා ඉල්ලා සිටින්නේ යැයි කී හෙතෙම තොරතුරු යනු මහජන දේපළක් යැයි අවධාරණය කර කීය.
 
ඇතැම් රාජ්‍ය සේවකයන් තොරතුරු යනු පුද්ගලික බූදලයක් යැයි සිතා සිටින නමුත් තොරතුරු ලබාදීමේදී දකුණු ආසියාවේ හොදම ප්‍රතිචාරය ඇත්තේ ලංකාවේ යැයි ද රණසිංහ මහතා වැඩිදුරටත් කීවේය.
 
පියතිස්ස රණසිංහ මහතා මේ අදහස් පළ කළේ ජාත්‍යන්තර තොරතුරු දැනගැනීමේ අයිතිවාසිකම් දිනයට සමගාමීව තොරතුරු අයිතිය හා තොරතුරු නීතිය පිළිබඳව සන්නිවේදනයේදී මාධ්‍යවේදියාගේ කාර්යභාරය මැයෙන් මුදල් හා ජනමාධ්‍ය අමාත්‍යංශය මගින් සංවිධානය කළ වැඩමුළුවක මුඛ්‍ය දෙසුම සිදුකරමිනි.

ඡායාරූප - චතුර එස් .කොඩිකාර