(එෆ්.අස්ලම්)
 
දෙමළ ජාතික සන්ධානයේ නායකත්වය තුළ වෙනසක් සිදුව එම සන්ධානය මෙරට පිළිගත් දේශපාලන පක්ෂයක් ලෙසට ලියාපදිංචි වූයේ නම් පමණක් තමන් එම සන්ධානයේ මහ ඇමති අපේක්ෂකයාව තරග වදින බව උතුරු පළාත් ප්‍රධාන අමාත්‍ය සී.වී විග්නේෂ්වරන් සදහන් කරයි.
 
එමෙන්ම තම මහ ඇමති ධූරය අහිමිව ගියත් දෙමළ ජනතා සංසදය කෙරෙහි වැඩි අවධානයක් යොමු කරමින් දෙමළ ජනතාවගේ අර්බුදය ජාත්‍යන්තරයට ගෙන යන බවත් ඊට පක්ෂ භේද අදාල නැති බවත් මහ ඇමතිවරයා වැඩිදුරටත් සඳහන් කරයි.
 
උතුරු පළාත් සභාවේ නිල කාලය අවසන් වීම සහ සිය  දේශපාලන කටයුතු සම්බන්ධයෙන් මාධ්‍ය වෙත අදහස් දක්වමින් විග්නේෂ්වරන් මහතා මේ බව අවධාරණය කළේය.
 
‘‘උතුරු පළාත් සභාවේ සමහර පසුබෑම්වලට දේශපාලන වශයෙන් ඇම හෙලන සිහිමද ගතියෙන් පෙළෙන කිහිප දෙනෙකු හේතුවෙනවා.එවන් තත්ත්වයක  වුවද අපි අපේ වැඩ ක්‍රියාත්මක කළා.උතුරු පළාත් සභාවේ අපි කරපු ඒ වැඩ ගැන අත්පොතක් මෑතකදී නිකුත් වෙනවා.එය කියවා ජනතාවටත්  අවබෝධ කරගන්න පුළුවන්.
 
මම සෑම විටම දෙමළ ජාතික සන්ධානයේ නායක ආර්.සම්බන්ධන් මුණ ගැහිලා මේ තත්වය ගැන පැහැදිලි කරල දෙන්න සූදානමින් සිටිනවා. ඔහු එක්ක මගේ කිසිම අමනාපයක් නැහැ.එතුමන්ට කැමති නම් මාව හමුවීමට කිසිදු බාධාවක් ඇතිවෙන්නෙ නැහැ. 
 
ඒ වගේම  නව දේශාපාලන බලවේගයක් පිහිටුවා ඉදිරි පළාත් සභා මැතිවරණයට පැමිණෙනවද කියල මෙතෙක් තීරණය කරල නැහැ.නමුත් 
මගේ තීරණය  ප්‍රතිපත්තිමය වශයෙන් ගනු ලබන තීරණයක් වේවි. ‘ යැයිද මහ ඇමතිවරයා පෙන්වා දුන්නේය.‘‘