(බිඟුන් මේනක ගමගේ) 
 
ජුඩ් රත්නම් මහතා විසින් අධ්‍යක්ෂණය කළ ‘ඩීමන්ස් ඉන් පැරඩයිස්‘ චිත්‍රපටිය මේ දිනවල යාපනයේ පැවැත්වෙන ජාත්‍යන්තර චිත්‍රපට උළෙලේ ප්‍රදර්ශනය නොකරන්නට එහි සංවිධායකයින් විසින් ගත් තීරණය තරයේ හෙළා දකින්නේ යැයි නිදහස් මාධ්‍ය ව්‍යාපාරය නිවේදනයක් නිකුත් කරමින් පවසයි.
 
ජාත්‍යයන්තර චිත්‍රපට උළෙලවලදී  සම්මානයට පාත්‍ර වූ හා යුද්ධයේ වින්දිතයින් වශයෙන් ජිවත් වු යාපන ජනතාව ගේ කෝණයෙන් යුද්ධය දෙස බැලු දමිල වාර්තා චිත්‍රපටයක් ලෙස විචාරකයින් ගේ  ප්‍රශංසාවට භාජනය වූ ඊට බාධා පමුණුවීම කනගාටුවට කරුණක් යැයි එම නිවේදනයේ සඳහන් වේ.
 
යාපනය චිත්‍රපට උළෙලට චිත්‍රපට ඇතුලත් කිරීම පිණිස එහි සංවිධායකයින් විසින් සකස් කොට තිබු ක්‍රමවේදය අධ්‍යක්ෂවරයා අනුගමනය නොකිරීම නිසා චිත්‍රපටිය ප්‍රදර්ශන නාමාවලියෙන් එය ඉවත් කළ බවට එහි සංවිධායකයන් පැවසුව ද අධ්‍යක්ෂවරයා එම තර්කය ප්‍රතික්ෂේප කරන්නේ යැයි ද නිදහස් මාධ්‍ය ව්‍යාපාරය කියයි.
 
චිත්‍රපට සංවිධායක කමිටුවේ සභාපතිවරයාට මෙම චිත්‍රපට යාපනයේ ප්‍රදර්ශනය කිරීමෙන් වලකින ලෙසට එල්ල වු බලපෑම් නිසා වෙනත් හේතූන් ඉදිරිපත් කරමින් එය ප්‍රදර්ශනය නොකිරීමට තීරණය කර ඇති බව අධ්‍යක්ෂවරයා පවසන්නේ යැයි කියන නිදහස් මාධ්‍ය ව්‍යාපාරය චිත්‍රපට උළෙලෙහි ප්‍රදර්ශනයට නියමිත චිත්‍රපට ලේඛනයෙහිද නම තිබියදී ඒ පිළිබඳ ප්‍රවෘත්ති පවා පළ වි තිබියදී මෙම චිත්‍රපටය උළෙලින් ඉවත් කිරිම හේතුවෙන් සිදුවීම පිටු පස යම් අදිසි  හස්තයක් ක්‍රියාත්මක වු බවට ඇති සැක තහවුරුවන්නේ යැයි ද පවසයි.
 
එවැනි බලපෑමක් එල්ල වුද මෙවැනි ජාත්‍යයන්තර උළෙලක සංවිධායක මණ්ඩලයක් ඊට අවනතවීම වඩාත් කනගාටුදායක තත්ත්වයක් යැයි ද එම නිවේදනයේ සඳහන් වේ.
 
දීර්ඝ කාලයක් පැවති ආණ්ඩුවේ හමුදා හා දමිල ආයුධ සන්නද්ධ කණ්ඩායම් අතර සිවිල් යුද්ධයකට මැදි වි සිටි යාපනයේ ජනතාවට අදහස් ප්‍රකාශ කිරීමේ නිදහස දෙපාර්ශවය විසින්ම අවහිර කොට තිබු බව අමුතුවෙන් කිව යුතු නොවන්නේ යැයි ද යුද්ධයෙන් පසු සංක්‍රාන්ති යුක්ති ක්‍රියාවලියක් ඔස්සේ නැවත ප්‍රජාතන්ත්‍රවාදි අයිතිවාසිකම් භූක්ති විදින්නට හැකියාවක් ලැබෙන්නේ අදහස් ප්‍රකාශනයේ නිදහස වැනි ප්‍රජාතන්ත්‍රවාදයේ මුලිකංග තහවුරුව පවතින්නේ නම් පමණක් යැයි ද එම නිවේදනයේ වැඩිදුරටත් සඳහන් වේ.