(බිඟුන් මේනක ගමගේ )

පුද්ගලික හා දේශපාලනික හේතූන් මත ජාතික ආරක්ෂාව ඈඳාගනිමින් රජය, ආරක්ෂක අමාත්‍යාංශය හා යුද්ධ හමුදා නායකත්වය විවේචනය කිරීම සමස්ථ යුද්ධ හමුදාවම තරයේ හෙලා  දකින්නේ යැයි ශ්‍රී ලංකා යුද හමුදා මූලස්ථානය නිවේදනයක් නිකුත් කරමින් පවසයි.

ඇතැම් විශ්‍රාමික හමුදා නිළධාරීන් විසින් ශ්‍රී ලංකා යුද්ධ හමුදාවේ යුදමය සූදානම පිළිබඳව ඔවුන් සෑහීමකට පත් නොවන බැව් ප්‍රකාශ ඇතැයි ද වසර ගණනාවකට පසුව විශ්‍රාම ගොස් පිටත සිට යුද්ධ හමුදාවේ යුධමය ශක්තිය පිළිබඳව සමාලෝචනය කිරීමට කිසිවෙකුට නොහැකි යැයි ද එම නිවේදනයේ සඳහන් වේ.

අවශ්‍ය අවස්ථාවන්හීදි හිටපු යුද්ධ හමුදාධිපතිවරුන් මෙන්ම, අත්දැකීම් සහිත විශ්‍රාමික ජ්‍යෙෂ්ඨ නිළධාරීන් සමග අදහස් හුවමාරු කර ගනිමින් යුද්ධ හමුදාවේ ශක්තිය තවදුරටත් වර්ධනය කිරීමට යුද්ධ හමුදාව සෑමවිටම ක්‍රියාකර ඇතැයි ද ඉදිරියටත් එසේ කටයුතු කිරීමට කිසිඳු අවස්ථාවක නොපසුබට වන්නේ යැයි ද එම නිවේදනය මගින්  හමුදා මූලස්ථානය පවසයි. 

තවද, යුද්ධ හමුදා සංස්ථා යථායෝග්‍ය ප්‍රමාණකරණය යටතේ අඩු භට පිරිසකගෙන් යුත් බළඇණි සංඛ්‍යාත්මක වශයෙන් ශක්තිමත් කර ඇති අතර, එමගින් ඛණ්ඩ හා කණ්ඩායම් වශයෙන් නිසි ආකාරව සංවිධානය වී ඕනෑම තත්වයකට මුහුණදීමට සියළුම බළඇණි පෙර සූදානමකින් යුතුව තැබීමට අවශ්‍ය ක්‍රියාමාර්ග ගෙන ඇති නමුත් යුද විශ්ලේෂකයින් යැයි හඳුන්වාගත් ඇතැම් පුද්ගලයින් විසින් එය කඳවුරු වසාදැමීමක් බවට අර්ථකතනය කර ඇතැයි ද  එසේ වසා ඇති යුදමය වශයෙන් වැදගත්වන කඳවුරු මොනවාද යන්න පෙන්වා දෙන ලෙස උක්ත යුද විශ්ලේෂකයින්හට අභියෝග කර සිටින බව ද ශ්‍රී ලංකා යුද්ධ හමුදාව පවසයි.  

යුද්ධයේ විජයග්‍රහණයෙන් පසු හමුදාපතිවරුන් සිව් දෙනෙකු යටතේ යුද්ධ හමුදාවේ යුදමය සූදානම උසස් තත්ත්වයකට ගෙන ඇතැයි ද නව තාක්ෂණය හා ජාත්‍යන්තර යුද ඥානය සමඟ දියුණු හමුදාවක් බවට ශ්‍රී ලංකා යුද්ධ හමුදාව පත්කර ඇතැයි ද ශ්‍රී ලංකා යුද්ධ හමුදා මූලස්ථානය පවසයි.

ඒ අනුව තම රට ආරක්ෂා කරදුන් සහ රට නැවත යුද්ධයකට ගෙනයාමට ඉඩනොදී වෘත්තියමය හමුදාවක් වශයෙන් කටයුතු කරන ඔබගේ ශ්‍රී ලංකා යුද්ධ හමුදාව කෙරෙහි තවදුරටත් තම විශ්වාසය තබාගන්නා ලෙස බුද්ධිමත් ජනතාවගෙන් ඉල්ලා සිටින බව ද එහි වැඩිදුරටත් සඳහන් වේ.