(සිරංගිකා ලොකුකරවිට)
 
ගාල්ල දිස්ත්‍රික්කයේ සියලුම ප්‍රදේශ වලට තවමත්  වැසි ඇද වැටෙමින් පවතින බැවින් ගිංගඟේ ජල මට්ටම ක්‍රමක්‍රමයෙන් ඉහළ යන බවත් පොල්අතුමෝදර ගඟ පිටාර මටිටමට ලඟා වී ඇති බවත් දිස්ත්‍රික් ආපදා කළමණාකරණ ඒකකය පවසයි.  
 
අද (09) උදෑසන 6.00න් අවසන් වූ පැය විසිහතර තුළ ගාල්ල දිස්ත්‍රික්කයේ වැඩිම වර්ෂාපතනය නාගොඩ ප්‍රදේශයෙන් වාර්තා වි ඇති අතර එය මිලි මීටර් 85කි. යක්කලමුල්ලට මිලිමීටර් 75ක වර්ෂාපතනයක් පතිත වී ඇත. 
 
පොල් අතුමෝදර ගඟේ ජල මට්ටම ඉහළ යාම හේතුවෙන් යක්කලමුල්ල නගරය ආශ්‍රිත ප්‍රදේශවල සුළු ගංවතුර තත්ත්වයක් වාර්තා වේ. 
 
දිගින් දිගටම වැසි ඇදවටෙන බැවින් ගාල්ල දිස්ත්‍රික්කය පුරා පහත් බිම් ජලයෙන් යටවී ඇති බවත් එම ප්‍රදේශ වල පිහිටි නිවාස වලට ගලාගිය ජලය බැස නොගොස් එලෙසම පවතින බවත් ආපදා අංශ පවසයි.
 
මේ අතර අද උදෑසන 5.00ට පමණ දිස්ත්‍රික්කයේ ඇතැම් ප්‍රදේශ වලින් තද සුළං තත්ත්වයක් වාර්තා වූ නමුත් මෙතෙක් හානි කිසිවක් වාර්තා වී නොමැත. 
 
දිස්ත්‍රික් ආපදා කළමණාකරණ ඒකකයේ ප්‍රධානී කර්නල් දම්පත් රත්නායක මහතා පැවසුයේ උණගස් රැඳී අවහිර වී තිබූ අගලිය මුල්කඩ පාලම හා අවිත්තාව පාලමේ උ ණ ගස් ඉවත් කිරීමේ කටයුතු නාවුක හමුදාව හා වාරිමාර්ග දෙපාර්තමේන්තුවේ සහයෝගයෙන් සිදුකළ බවයි.
 
 අද වක්වැල්ල පාලමේ උණගස් ඉවත් කිරීමේ කටයුතු සිදුකරීමට නියමිත බවද ඔහු වැඩි දුරටත් සඳහන් කළේය.
 
හදිසි තත්ත්වයක් ඇතිවුවහොත් ක්‍රියාත්මක වීම සඳහා මුදවා ගැනීමේ භට පිරිස් නෙළුව, තවලම හා නාගොඩ  ප්‍රදේශ වල ස්ථානගත කර ඇති බවද එම ඒකකය පවසයි.