(ක්‍රිෂාන් ජීවක ජයරුක්)
 
ගංවතුර හේතුවෙන් මාතර දිස්ත්‍රික්කයේ පීඩාවට පත් පුද්ගලයින් පිරිස අද (25) වන විට 14,000 දක්වා ඉහළ ගොස් ඇතැයි මාතර දිස්ත්‍රික් ආපදා කලමණාකරණ මධ්‍යස්ථානයේ සහකාර අධ්‍යක්ෂක මේජර් ප්‍රභාත් කළුබෝවිල මහතා පැවසීය.
 
පවුල් 4000 ක්‍ පමණ මෙම ව්‍යසනයට මුහුණ පා සිටිති.
 
මේ වන විට සම්පූර්ණයෙන් විනාශ වී ඇති නිවාස ගණන 10 දක්වා ද අර්ධ වශයෙන් හානි වු නිවාස ගණන 209 ක්‍ දක්වා ද ඉහළ ගොස් තිබෙන බව මාතර දිස්ත්‍රික් ලේකම් කාර්යාලයේ ආපදා සහන සේවා සම්බන්ධීකාරක අනුජන්ත විදානගේ මහතා පැවසීය.
 
මාතර ගොඩගම ප්‍රදේශයේ නිවසක් මතට පස් කන්දක් හදීසියේ කඩා වැටීම නිසා එහි නිවැසියන් ඊයේ (24) අනූ නවයෙන් සිය ජීවිත බේරා ගෙන තිබුණි.
 
මේ වන වන විට මාතර දිස්ත්‍රික්කයේ පස්ගොඩ හා තිහගොඩ යන ප්‍රාදේශීය ලේකම් කොට්ඨාස වල අවතැන් කඳවුරු තුනක් පවත්වා ගෙන යන අතර ඒවායෙහි පවුල් 60 ක සාමාජිකයින් 275 දෙනෙකු තාවකාලිකව නවාතැන් ගෙන සිටින බව ද විදානගේ මහතා වැඩි දුරටත් කීය.

එම පිරිස් සදහා මාතර මහ දිසාපති ප්‍රදීප් රත්නායක මහතාගේ උපදෙස් මත පිසූ ආහාර ලබා දීමට කටයුතු කර තිබේ.
 

ඊට අමතරව පීඩාවට පත් අනෙක් සියලු දෙනාට ද සහන සැලසීම සදහා මුදල් වෙන් කර දී ඇත.මේ වන විට දිස්ත්‍රික්කයේ ප්‍රදේශ රැසක ගණනාව ගංවතුර හේතුවෙන් කොටු වී සිටින අතර ඔවුන්ට එගොඩ මෙගොඩ යාම සදහා බෝට්ටු සේවාවන් ද ආරම්භ කර තිබේ.

 පසුගිය දිනවල පැවති ධාරාණිපාත වර්ෂාවේ යම් අඩුවක් අද  (25) දිනය දැක ගත හැකි විය.මීට අමතරව විශාල ගස් හා පස් කඳු කඩා වැටීම නිසා ප්‍රදේශ රැසක විදුලිය හා දුරකතන සම්බන්ධතා විසන්ධී වී පවතී.