(සිරංගිකා ලොකුකරවිට)

හදිසි ආපදා හේතුවෙන් ගාල්ල දිස්ත්‍රික්කයේ පුද්ගලයන් අට දෙනකු මියගොස් පස් දෙනකු තුවාල ලබා ඇතැයි ජාතික ආපදා කළමනාකරණ මධ්‍යස්ථානයේ ගාල්ල දිස්ත්‍රික් කාර්යාලය පවසයි. 

මේ වනවිට ආපදා තත්ත්වය පහව ගොස් ඇති අතර ගිං ගඟේ ජල මට්ටම ද පහළ බැස පවතින බවත් ප්‍රදේශ කිහිපයක පහත්බිම් තවදුරටත් ජලයෙන් යටවී තිබුණ ද එම ජලය ද බැස යමින් පවතින බව ද ආපදා කලමනාකරණ මධ්‍යස්ථානය ප්‍රකාශකයකු කීවේය.  

ගාල්ල දිස්ත්‍රික්කයේ ආපදා වලින් පූර්ණ හානියට පත්වූ නිවාස සංඛ්‍යාව 158කි. අර්ධ හානි සිදුවූ නිවාස සංඛ්‍යාව 6785කි. ගාල්ල දිස්ත්‍රික්කයේ ග්‍රාම නිලධාරී වසම් 652ක පවුල් 7697ක පුද්ගලයන් 28,684ක් පීඩාවට පත්ව සිටිති.

මේ අතර නායයාමේ අවදානමක් පවතින බැවින් ඇල්පිටිය ප්‍රාදේශීය ලේකම් කොට්ඨාසයේ පදිංචි පවුල් අටක් ඔවුන්ගේ නිවෙස් වලින් ඉවත් කර ඇතැයි ද ආපදා කලමනාකරණ මධ්‍යස්ථානයේ ගාල්ල සහකාර අධ්‍යක්ෂ ලුතිනල් කර්නල් දම්පත් රත්නායක මහතා පවසයි.