(සිරංගිකා ලොකුකරවිට)

ගාල්ල දිස්ත්‍රික්කයෙන් 2017 වර්ෂයේ ජුනි මාසය වනවිට මී උණ රෝගීන් 101ක් වාර්තා වී ඇති බවත් රෝගීන් 04 දෙනකු මේ වන විට මියගොස් ඇති බවත් ගාල්ල දිස්ත්‍රික් පරිපාලන මහජන සෞඛ්‍ය පරීක්ෂක කේ. පාලිත විජේසේන මහතා පවසයි.

ඒ මහතා මෙසේ පැවසුවේ ගාල්ල දිස්ත්‍රික් කෘෂිකර්ම කමිටු රැස්වීම දිස්ත්‍රික් ලේකම් කාර්යාල ශ්‍රවණාගාරයේ පැවති අවස්ථාවේදී ය.

මී උණ හෙවත් ලෙප්ටෙස්පයිරෝයිස් රෝගීන් වැඩි ප්‍රමාණයක් වාර්තා වී ඇත්තේ කරන්දෙනිය, ඇලිපිටිය, උඩුගම හා තවලම ප්‍රාදේශීය ලේකම් කොට්ඨාශ වලිනි.

පසුගිය දිනවල ඇතිවූ ගංවතුර තත්වය හේතුවෙන් ද මී උණ රෝගය පැතිරයාමේ වැඩි අවධානමක් පවතින හෙයින් වී, කුරුඳු හා තේ වැනි කෘෂිකාර්මික වගා බිම් වල වැඩ කරන සේවකයින් මේ සම්බන්ධව සැලකිළිමත් විය යුතු බවත්  ඒ සඳහා ඖෂධ ලබාගතයුතු බවත් පාලිත මහතා පවසයි.

ඒ මහතා පවසන්නේ පුරන් කුඹුරුවල මීයන් වැඩි වශයෙන් ගැවසෙන බැවින් එවැනි ස්ථාන වල වැඩ කරන පුද්ගලයින් වැඩි වශයෙන් ප්‍රවේසම් විය යුතු බවයි.

මහජන සෞඛ්‍ය පරීක්ෂක කාර්යාල වල මී උණ රෝගයට ලබාදෙන ඖෂධ අවශ්‍ය තරම් පවතින බව ද ඒවා නිසි මාත්‍රාවෙන් ලබාගැනීමෙන් මෙම රෝගයෙන් වැලකියහැකි බවද පාලිත මහතා පැවසුවේ ය.