(තිළිණි ද සිල්වා සහ රංජන් කටුගම්පොළ )

පාර්ලිමේන්තුවේ අනුමැතිය සඳහා ඉදිරිපත් කර තිඛෙන ඡන්දදායකයින් ලියාපදිංචි කිරීමේ විශේෂ විධිවිධාන පනත් කෙටුම්පත අභියෝගයට ලක් කරමින් පාර්ලිමේන්තු මන්ත්‍රී උදය ගම්මන්පිල මහතා ඉදිරිපත් කර ඇති පෙත්සම විභාගයට නොගෙනම නිෂ්ප්‍රභ කළ යුතු යැයි නීතීපතිවරයා ඊයේ (19) ශ්‍රේෂ්ඨාධිකරණයට දැනුම් දුන්නේය.

අදාළ පනත් කෙටුම්පත ඉදිරිපත් කිරීමෙන් පසුව එය අභියෝගයට ලක් කරන පෙත්සමක් ඉදිරිපත් කළ යුතු කාල සීමාව ඇතුළත මෙම පෙත්සම් පිටපත් කථානායකවරයා වෙත ඉදිරිපත්  කිරීමට ගම්මන්පිළ මහතා කටයුතු නොකිරීම නිසා මෙම පෙත්සම ඉනත දැමිය යුතු බව නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් ජනක් ද සිල්වා මහතා වැඩිදුරටත් අධිකරණය හමුවේ කීය.

පාර්ලිමේන්තුවේ අනුමැතිය සඳහා ඉදිරිපත් කර තිබෙන ඡන්දදායකයින් ලියාපදිංචි කිරීමේ විශේෂ විධිවිධාන පනත් කෙටුම්පතෙහි ව්‍යවස්ථානුකූලභාවය පිළිබඳව විමසා බලන ලෙස ඉල්ලා ගොනු කර තිබූ  විශේෂ පෙත්සම පිළිබඳ වැඩිදුර කරුණු සලකා බැලීම ඊයේ (19) ශ්‍රේෂ්ඨාධිකරණය හමුවේ සිදු කෙරුණු අවස්ථාවේදී නියෝජ්‍ය සොලිසිටර් ජනරාල්වරයා මෙම කරුණු දැක්වීම සිදු කරන ලදී.‍

මෙම විශේෂ පෙත්සම බුවනෙක අළුවිහාරේ,සිසිර ද ආබෘෘ සහ අනිල් ගුණරත්න යන මහත්වරුන්ගෙන් සමන්විත ත්‍රිපුද්ගල විනිසුරු මඩුල්ල හමුවේ කැඳවිණි.

පාර්ලිමේන්තු මන්ත්‍රී උදය ගම්මන්පිල සහ මහරගම නගර සභාවේ හිටපු නාගරික මන්ත්‍රීවරයෙකු වන නිශාන්ත විමලචන්ද්‍ර මහත්වරුන් විසින් ගොනු කළ මෙම පෙත්සමේ වගඋත්තරකරු වශයෙන් නීතිපති නම් කරනු ලැබ ඇත.