විනීතා එම් ගමගේ

කරදියාන කසල රැඳවුම් හේතුවෙන් බොල්ගොඩ ගඟ විනාශ වෙමින් ඇතැයි මධ්‍යම පරිසර අධිකාරිය කළ අධ්‍යයනවලදී හෙළිවී ඇත.

එම කසල රඳවනය දෙහිවල මහ නගර සභාව, බොරලැස්ගමුව නගර සභාව, ශ්‍රී ජයවර්ධනපුර කෝට්ටේ මහ  නගර සභාව, කැස්බෑව  නගර සභාව කැස්බෑව ප‍්‍රාදේශීය සභාව සහ  මොරටුව මහ නගර සභාවේ  කසළ රඳවන ලද ස්ථානයකි.

2003 වසරේ සිට මේ දක්වා එහි කසල දමන අතර කිසිදු ප‍්‍රමිතියකින් තොරව එහි කසල රඳවන බව මධ්‍යම පරිසර අධිකාරියේ අධ්‍යයනයෙන් හෙළිවී තිබේ. 

එම කසල කන්ද හා බොල්ගොඩ ගඟ අතර මේ වනවිට ඇත්තේ අඩි හතරක පමණ පරතරය කැයි මධ්‍යම පරිසර අධිකාරියේ සභාපති චන්ද්‍රරත්න පල්ලේගම මහතා කළ විමසීමකදී ප‍්‍රකාශ කළේය.

මේ බව සනාථ වූයේ ගුවන් හමුදාවේ සහය ඇතිව ලබාගත් නිරික්ෂණ වාර්තා හා ඡායාරූප වලින් යැයි ද හෙතෙම සඳහන් කළේය.

බොල්ගොඩ ගඟ ආශ්‍රිත ප‍්‍රදේශය මෙරට ප‍්‍රධානතම තෙත්බිම්  පද්ධතියක් වන අතර විශාල වපසරියක ජල ධාරිතාව රඳවාගන්නා ජලාශයකි.

තෙත් බිම් ආශ‍්‍රිත පක්ෂින් බෝවීම හා ගොදුරු බිම වන මෙම පරිසර  පද්ධතියව සංක‍්‍රමනික පක්ෂින්ගේ ද නවාතැන් පොළකි.

එමෙන්ම නාගරික වටපිටාවක් සහිත මෙම තෙත් බිමෙන් ලංකාවේ දුර්ලභම ක්ෂිරපායි සත්වයින් රැසක් හමුවී ඇති බව පැවසේ.

විශේෂයෙන් දිය  බල්ලා කොළ දිවියා හා හඳුන් දිවියා ද මෙම තෙත් බිමෙන් හමුවී තිබේ.

කෙසේ වෙතත් මේ වනතුරුත් බොල්ගොඩ ගඟ ආශ්‍රිත ප‍්‍රදේශයේ මේ වනතුරුත් නිසි අධ්‍යයනයක් සිදුවී නැතැයි පරිසරවේදීහු පෙන්වා දෙති.