හිරාන් ප්‍රියංකර ජයසිංහ 
 
මුලතිව් නයාරු මුහුදු වෙරළෙන් මුහුදු ගොස් අතුරුදන් වූ හලාවත කරුකුපනේ ධීවරයින් තිදෙනා ඉන්දියාවේ කඩලුර් ආසන්නයේ පොලිසියක රඳවා ඇති බවට තොරතුරු ලැබී ඇතැයි ඔවුන්ගේ  ඥාතීහු පවසති.

 
හලාවත කරුකුපනේ පදිංචිව සිටි මිල්රාජ් මිරැන්ඩෝ (50), නිදුර්කන් මිරැන්ඩෝ (24) සහ එම්මනුවෙල් මිරැන්ඩෝ (48) යන තිදෙනා පසුගිය 12 වැනිදා අලුයම නයාරු වලින් මුහුදු ගොස් ඇත. මිල්රාජ් සහ එම්මනුවෙල් සහෝදරයන් වන අතර නිදුර්කන් මිල්රාජ්ගේ පුතනුවන්ය. 
 
දින 10 කට ආසන්න කාලයක් කිසිදු තොරතුරක් නොමැතිව සිටි මෙම ධිවරයින් ඉන්දියාවේ වේලක්කන්නි මැණියන්ගේ දේවස්ථානය  ආසන්නයේ පිහිටි නඩලුර්   පොලිසියක රඳවා සිටින බවට තොරතුරු ඇතැයි ඥාතීහු කියති.
 
ඔවුන් ගිය සතිස් පුතා නමින් සිංහලින් සඳහන් කර ඇති නිල් කහ පැහැති යාත්‍රාව නඩලුර් වෙරළේ  ගාල් කර තිබෙන ඡායාරූප අද තමන්ට ලැබුණු බව ද ඥාතීහු පවසති.
 
මේ පිරිස හැකි ඉක්මණින් ලංකාවට ගෙන්වා දෙන ලෙස  ඔවුහු රජයෙන් ඉල්ලති.