(මනෝප‍්‍රිය ගුණසේකර)
 
කොපමණ කාලයක් උපවාස කළත් අධිකරණයේ ඇති නඩුවක් වෙනත් අධිකරණයකට මාරු නොකරන බව පාර්ලිමේන්තු මන්ත‍්‍රී එම්.ඒ. සුමන්තිරන් මහතා ඝාතනය කිරීමට කුමන්ත‍්‍රණය කළ  බවට චෝදනා ලැබ සිටින කොටි සාමාජිකයින් පස්දෙනෙකුට කොළඹ මහාධිකරණ විනිසුරු චම්පා ජානකී රාජරත්න මහත්මිය අද (4) පහදා දුන්නාය.

තමන්ට එරෙහි නඩුව යාපනය මහාධිකරණයට මාරු කරවා ගැනීම සඳහා තමන් දින 14ක කාලයක් පුරා උපවාසයක නිරත වන බවත් එදින සිට මේ මොහොත දක්වා කිසිදු ආහාරයක් ගෙන නොමැති බවත් එම කොටි සාමාජිකයින් කොළඹ මහාධිකරණ විනිසුරු චම්පා ජානකී රාජරත්න මහත්මියට දැනුම් දුන් අවස්ථාවේදී විනිසුරුවරිය අදාළ තත්වය පහදා දුන්නාය.

මීට පෙර දිනයේදී මෙම විත්තිකරුවන් අධිකරණය අමතමින් තමන්ට එරෙහි නඩුව යාපනය මහාධිකරණයට මාරු නොකළහොත් තමන් උපවාසයක් ආරම්භ කරන බව දැනුම් දුන් අවස්ථාවේදී විත්තිකරුවන් ඇමතූ විනිසුරුවරිය නීතීපතිවරයා ඉදිරිපත් කළ නඩු වෙනත් අධිකරණ වලට මාරූ කිරීමට තමන්ට බලයක් නොමැති බව පවසමින් එම නඩුව විත්තිකරුවන්ගේ ඉල්ලීම ප්‍රතික්ෂේප කළාය.

පාර්ලිමේන්තු මන්ත‍්‍රී එම්.ඒ. සුමන්තිරන් මහතා ඝාතනය කිරීමට කුමන්ත‍්‍රණය කළ  බවට කොටි සාමාජිකයින් පස්දෙනෙකුට එරෙහිව පවරා ඇති නඩුව කැඳවනු ලැබු අවස්ථාවේදී අධිකරණයේ පෙනී සිටි කොටි සාමාජිකයින් තිදෙනෙකු එලෙස දැනුම් දුන් විට මහාධිකරණ විනිසුරුවරිය එලෙස තත්වය පහදා දුන්නාය.

මෙම නඩුවේ වැඩිදුර විභාගය ලබන දෙසැම්බර් 5 වැනිදා දක්වා කල් තැබිණි.