විපක්ෂය කතානායකවරයාට එරෙහිව දෝෂාභිගයක් ගෙන ඒමට ගත් උත්සහාය වළක්වාලමින් හමුදාව යොදවා  මන්ත්‍රීවරුන් පාර්ලිමේන්තුවට පිවිසීම නවතා දැමීමට මාලදිවයිනේ ජනාධිපති අබ්දුල්ලා යමීන් අද (24) කටයුතු කළේය. 

නිරන්තර දේශපාල අර්බුදවලින් සමන්විත සංචාරක පරාදීසයක් වන මාලදිවයිනේ ඇති වූ අලුත්ම අර්බුදය මෙයයි. අද (24) දිනයේදී මාලදිවයිනේ කතානායක අබ්දුල්ලා මෂීෂ්ට එරෙහිව විශ්වාසභංගයක් ගෙන ඒමට නියමිතව තිබිණි. කෙසේ නමුත් හමුදාව යොදවා පාර්ලිමේන්තුවට පිවිසීම නතර කර දැමීමට කටයුතු කර තිබූ බව එරට ‘ඩිමොක්‍රටික්’ පක්ෂය සඳහන් කළේය. 

විපක්ෂයේ ඇතැම් මන්ත්‍රීවරුන් බාධකවලින් පැන පැමිණි බවත් ඔවුන් ඉවත් කිරීම සඳහා හමුදාව ගම්මිරිස් යොදන ලද දියර භාවිත කළ බවත් එම පක්ෂයේ ප්‍රකාශක හමීඞ් අබ්දුල් ගාෆූර් පැවැසීය.

“සඳුඳා දිනයේදී අප පාර්ලිමේන්තුවට යනවිට හමුදාව එය අවහිර කර තිබුණා. මන්ත්‍රීවරුන් පාර්ලිමේන්තු පරිශ්‍රයට පිවිසීමට හැකියාවක් තිබුණේ නැහැ. මන්ත්‍රීවරුන් පාර්ලිමේන්තු පරිශ්‍රයට පිවිසීම බලයා යොදවා නවතා දැමුවා” යැයි මාලදිවයිනේ විපක්ෂය නිවේදනයක් නිකුත් කරමින් සඳහන් කළේය. 

මාලදිවයින් රජය මේ සම්බන්ධයෙන් කිසිදු නිවේදනයක් නිකුත් කර නොතිබිණි.  

මාලදිවයිනේ විපක්ෂය මේ මසදී කතානායකවරයාට එරෙහිව දෝෂාභියෝගයක් ගෙන ඒමට ආණ්ඩුවේ ඇතැම් කොටස්වල සහාය දිනාගැනීමට ද සමත්විය. ඒ ලබන වසරේ පැවැත්වෙන ජනාධිපතිවරණයට පෙර පාර්ලිමේන්තුවේ පාලනයට සියතට ගැනීමේ අරමුණිනි. 

ආණ්ඩුව සෑම අවස්ථාවකදීම විපක්ෂයේ ක්‍රියාමාර්ගවලට බාධා එල්ල කරන ලදි.  පසුගිය සතියේදී විපක්ෂයේ මන්ත්‍රීවරුන් කිහිපදෙනකු ද අත්අඩංගුවට පත්වූ අතර විශ්වාසභංගයට අවශ්‍ය අත්සන් ප්‍රමාණය අඩු කිරීම ආණ්ඩුව අවශ්‍යතාව විය.  කතානායකවරයාට එරෙහිව පළමුවරට පසුගිය මාර්තු මාසයේදී දෝෂාභියෝගයක් ගෙන ඒමට විපක්ෂය කටයුතු කළ අතර එම අවස්ථාවේදී හමුදාව යොදවා විපක්ෂ මන්ත්‍රීවරුන් බලහත්කාරයෙන් පාර්ලිමේන්තුවෙන් ඉවතට දැමීමට යමීන් ජනාධිපතිවරයා කටයුතු කළේය. 

මාලදිවයිනේ දේශපාලන අර්බුදකාරී තත්ත්වය ජාත්‍යන්තරයේ අවධානයට ද යොමු වී තිබෙන අතර කඩිනමින් ප්‍රජාතන්ත්‍රවාදය ස්ථාපිත කරන්නැයි ඇමෙරිකා එක්සත් ජනපදය මාලදිවයිනට අවධාරණය කර තිබේ. 

බලයෙන් පහ කළ හිටපු ජනාධිපති මොහමඞ් නෂීඞ් විපක්ෂ සන්ධානයට නායකත්වය ලබාදෙයි. නෂීඞ් ලබන වසරේ පැවැත්වෙන පැවැත්වෙන ජනාධිපතිවරණයට තරග කිරීමට බලාපොරොත්තු වන අතර එසේ නමුත් ඔහු දැවැන්ත අභියෝගයක් තිබේ.  විපක්ෂයේ ප්‍රධාන නායකයෝ බොහෝමයක් අත්අඩංගුවට හෝ දීර්ඝකාලීනව සිරභාරයට පත්වීමෙන් වැළැකීම සඳහා හෝ රටින් පිටවී සිටිති. 

මේ අර්බුදකාරී තත්ත්වය නිසා මාලදිවයිනේ සංචාරක කර්මාන්තයට ද දැඩි තර්ජනයක් එල්ල වී තිබේ.  මොහොමඞ් නෂීඞ් මාලදිවයිනේ ප්‍රජාතන්ත්‍රවාදීව තේරී පත්වූ පළමු ජනාධිපතිවරයායි. ඔහු 2013 වසර දක්වා ජනාධිපතිධුරය හෙබ වූ අතර එම වසරේ පැවැති මතභේදාත්මක ජනාධිපතිවරණයෙන් අබ්දුල්ලා යමීන් ජයග්‍රහණය කළේය. 

ත්‍රස්තවාදයට සහාය දැක්වූ බව සඳහන් කරමින් මොහොමඞ් නෂීඞ් ට 2015 වසරේදී වසර 13ක සිර දඬුවමක් නියම විය. එම සිරදඬුවම දේශපාලනික පළිගැනීමක් යැයි ද පැවැසිණි. ඔහු දැනට බ්‍රිතාන්‍යයේ දේශපාලන රැකවරණය සහිතව ජීවත්වෙයි.  

 (ඒ.එෆ්.පී-055 )