(විනීතා එම් ගමගේ)

මීතොටමුල්ල කූණු කන්දේ ඛේදවාචකය සිදු වූ ප‍්‍රදේශය අවට අවදානම් කළාපයක් ලෙස නම් කොට එම ප‍්‍රදේශයේ ගෙවල් 130 ක පමණ පදිංචිකරුවන් තාවකාලිකව ඉවත්කිරිමට උපදෙස් දුන් බව ජාතික ගොඩනැගිලි පර්යේෂණ සංවිධානය කියයි.

මෙම ප‍්‍රදේශය පිළිබඳව හා එහි ඉදිරියේ දී කළයුත්තේ කුමක්දැයි යන්න පිළිබඳව ඉක්මණින්ම නිර්දේශ දීමට බලාපොරොත්තු වන බව ජාතික ගොඩනැගිලි පර්යේෂණ සංවිධානයේ නායයෑම්, අවදානම් කළාප හා පර්යේෂණ අධ්‍යක්ෂ ආර් එම් එස් බණ්ඩාර මහතා ලංකාදීපයට පැවැසීය.

සිදුවී ඇත්තේ කුණු කන්ද නාය යාම නොව කුණු කන්දේ බර පොළව මත තෙරපීම නිසා නිවාස තිබු පැත්තේ පොළව ඉලිප්පී නිවාස පෙරලීම බව කී බණ්ඩාර මහතා ඒ මතට පසුව කුණු පෙරලී ඇතැයි ද කීය. එමෙන්ම එහි පස් පෙරළිමක් ද සිදුව ඇතැයි බණ්ඩාර මහතා පැවැසීය.

පවතින තත්ත්වය යටතේ තව දුරටත් කුණු දැමුවහොත් පවතින අවදානම තව දුරටත් වැඩි විය හැකි බව ද ඒ මහතා කීය.

 මේ  වනවිට ප‍්‍රදේශයේ කාණු සියල්ලම වැසී පවතින නිසා සුළු ගංවතුර තත්ත්වයක් පවතින බවත් වැසි ලැබුණහොත් ගංවතුර අවදානමක් ද ඇතිවිය හැකි බවත් හෙතෙම කීවේය.