(බිඟුන් මේනක ගමගේ)

සංචාරකයන්ට වාරණයක් දැමීමට තරම් ඒ (එච්1එන්1 )  රෝගය බරපතල ලෙස වර්ධනය වී නැතැයි සෞඛ්‍ය අමාත්‍යංශය කියයි. 2005 ජාත්‍යන්තර සෞඛ්‍ය රෙගුලාසි අනුව ලෝක සෞඛ්‍ය සංවිධානයේ නියෝජනය කරන කිසිදු රටකට තවත් සාමාජික රටකට එවැනි තහනමක් පැනැවීමට නොහැකි යැයි ද සෞඛ්‍ය අමාත්‍යංශය වැඩිදුරටත් පෙන්වා දෙයි. 

ලංකාවේ සංචාරය නොකරන්නැයි කටාර් රාජ්‍යය කළ නිවේදනයට අදාළව කරුණු දක්වමින් සෞණ්‍ය අමාත්‍යංශයේ ලේකම් අනුර ජයවික්‍රම මහතා විසින් විදේශ අමාත්‍යංශයේ ලේකම් ඇසල වීරකෝන් මහතාට යොමුකරන ලද ලිපියක් මගින් මෙ බව දන්වා තිබේ. 
මේ වනවිට ලංකාවේ පවතින්නේ ද 2009 සිට ලොව පුරාම කලින් කලට දකින්නට ලැබුණු තත්ත්වයක් යැයි ද වාර්ෂික මෝසම් වැසි කාලය සමඟ දෙසැම්බර් සිට පෙබරවාරි දක්වාත් මැයි සිට ජූලි දක්වාත් මෙම තත්ත්වය මතු වීම සාමාන්‍ය කරුණක් යැයි ද එම ලිපියේ සඳහන් වේ. 

මහනුවර, කිලිනොච්චිය, යාපනය හා මොණරාගල දිස්ත්‍රික්කවල රෝගය පැතිර යාමේ වර්ධනයක් දැකිය හැකි වුවත් සමස්තයක් වශයෙන් ගත්විට පළමු මාස දෙකට සාපේක්ෂව අඩුවීමක් දැකිය හැකි යැයි පවසන අනුර ජයවික්‍රම මහතා මෙය අනපේක්ෂිත තත්ත්වයක් නොවන්නේ යැයි ද පවසයි. 

ඒ (එච්1එන්1 ) රෝගය සම්බන්ධයෙන් පළ වන බොහෝ මාධ්‍ය වාර්තා අසත්‍ය සහ පදනම්විරහිත පුවත් යැයි ද මෙම රෝගී තත්ත්වය දරුණු ලෙසම පැතිර ගිය 2009 වර්ෂයේදීවත් කිසිදු රාජ්‍යක් විසින් තවත් රාජ්‍යකට සංචාරක තහනමක් පැනවූයේ නැතැයි ද එම ලිපියේ වැඩිදුරටත් සඳහන් වේ.