(පාලිත ආරියවංශ)

“මංගල මහත්තයා බියර් මිල අඩු කරපු එක හොදයි.හැබැයි ඒ සුද්දන්නට.අපේ මිනිස්සුන්ට සෙතක් වෙන්න නම් කිතුල් රා බොන්න පහසුකම් ලබාදිය යුතුයි“ යැයි ඌව පළාත් ප්‍රධාන ඇමති චාමර  සම්පත් දසනායක මහතා පවසයි.

ඒ මහතා මේ බව පැවසුවේ පස්සර දී අද (12) පැවැති  පාක්ෂිකයන්ගේ හමුවකදීය.

 “ඌව පළාත වගේ අපේ ගම්මානවල මිනිස්සු බියර් බොන්නේ නැහැ . කසිප්පු බොන්නෙත් හොඳ මත්පැන් පහසු මිලට නැති නිසයි .අපේ මිනිස්සු රජකාලේ ඉඳන් පුරුදු වෙලා ඉන්න කිතුල් රා ටිකක් බොන්න දෙනවා නම් තමයි හොඳ.එතකොට උන්දලාගේ  මන දොලත් පිරෙනවා සෞඛ්‍යයත් හරි යනවා .

ඒ නිසා මම නම් කියන්නේ කිතුල් රා මැදීමට අවසර දීලා සියලු පහසුකම් දිය යුතුයි කියලා.විශේෂයෙන්ම කියන්න ඕන වෙළෙඳපොළේ අර්තාපල් මිල බැස්සුවම  ගම්මිරිස් වලට මිලක් නැති වුණාම වැටෙන්නේ අපේ මිනිස්සුන්ගෙ ආර්ථිකය.රටේම මිනිස්සුන්ට නිදහස ලබා දෙන්න කැරළි ගැසීම වරදක් කියලා අපේ පළාත විනාශ කළේ සුද්දෝ. වසර 200ක් ගත වෙලත් අපිට තාම නැගිටින්න බැරි වුණා.

ඒ නිසා මොන රජය වුණත් කරන කියන හැම දේකදීම අපිට විශේෂත්වයක්  අවශ්‍යයි .මංගල මහත්තයෝ මේවා ගැනත්  හිතලා පොඩි ඇජෙස්මන්ට් ‍ටික්ක දාන්න කියලා ඌවේ ජනතාව වෙනුවෙන් මා ඉල්ලා සිටිනවා “යැයි ඒ මහතා ප්‍රකාශ කරයි.