( උපාලි ආනන්ද )

උතුරු මැද පළාතේ පාසල් හතරක ඉදිරිකිරීම් කොන්ත්‍රාත් ලබාදී ඇති ආකාරය සම්බන්ධයෙන් විධිමත් පරීක්ෂණයක් සිදුකර වාර්තාවක් නොපමාව ලබාදෙන ලෙස උතුරු මැද පළාත් ආණ්ඩුකාර පී බී දිසානායක මහතා පළාත් ප‍්‍රධාන ලේකම් එච්.එම්.පී බංඩාර මහතාට නියෝග කර තිබේ.

ප‍්‍රසම්පාදන නියමයන් මුළුමණින්ම උල්ලංගණය කරමින් පාසල් හතරක ගොඩනැගිලි ඉදිකිරීමේ කොන්ත‍්‍රාත් දී ඇති බවත් ඒවා අත්හිටුවීමට වහාම කටයුතු කරන ලෙසත් ඉල්ලා ශ‍්‍රි ලංකා ජාතික ඉදිකිරීම් සංගමය දිසානායක මහතාට ලිඛිතව කළ පැමිණිල්ලක් අනුව මෙම නියෝගය කර ඇත.

එසේ නොකරන්නේ නම් අධිකරණ ක‍්‍රියා මාර්ගයකට අවතීර්ණ වන බව ද ශ‍්‍රි ලංකා ජාතික ඉදිකිරීම් සංගමයේ උතුරු මැද පළාත් ශාඛාවේ සභාපති ජී බී ලෝහිතරත්න මහතා කළ එම පැමිණිල්ලේ සඳහන් විය.

අනුරාධපුර දීපානි මහ විද්‍යාලයේ ප‍්‍රාථමික අංශයේ දෙමහල් ගොඩනැගිල්ල , කැකිරාව ඔලූකරද විද්‍යාලයේ ගොඩනැගිල්ලක්,හබරන මහ විද්‍යාලයේ සෞන්දර්ය  ගොඩනැගිල්ල  සහ අනුරාධපුර කේ.බී රත්නායක මහ විද්‍යාලයේ රැස්වීමි ශාලා ගොඩනැගිල්ල සඳහා ලබාදී ඇති කොන්ත‍්‍රාත් රජයේ ප‍්‍රසම්පාදන ක‍්‍රියාවලියෙන් තොර බව එම පැමිණිල්ලේ සඳහන් විය.