සිතුම් චතුරංග
          
වැටුප් වැඩිකිරීම් ඇතුළු ඉල්ලීම් කිහිපයක් මුල්කර ගනිමින් උතුරු පළාතේ සේවය කරන ලංකා ගමනාගමන මණ්ඩල සේවකයින් අද (4) වැඩවර්ජනයක නිරතවූහ.

දිවයිනපුරා ලංගම සේවකයින් විසින් වැටුප් වැඩිකිරීම් ඇතුළු ඉල්ලීම් අටක් මුල්කර ගනිමින් ආරම්භ කළ වැඩවර්ජනයට සහයෝගය පලකරමින් උතුරු පළාතේ ලංගම සේවකයින්ද වැඩවර්ජනයේ නිරතව සිටිති.

වවුනියාව , මන්නාරම ,යාපනය , කිලිනොච්චිය හා මුලතිව් දිස්ත‍්‍රික්කයේ ලංගම සේවකයින් , බස් රියදුරන් හා කොන්දොස්තරවරුන් මෙලෙස සේවයෙන් ඉවත්ව සිටිති.

වැඩවර්ජනයේ නිරත ලංගම සේවකයින් පවසා සිටියේ තමන්ගේ ඉල්ලීම් සඳහා ප‍්‍රවාහන අමාත්‍යවරයා සාධාරණ විසඳුමක් ලබාදෙන තුරු වැඩවර්ජනයේ නිරතවන බවයි.

ලංගම සේවකයින්ගේ වැඩවර්ජනය හේතුවෙන් උතුරු පළාතේ දුෂ්කර ප‍්‍රදේශවල සිට ගමන්කරන පාසල් සිසුන් සඳහා බස්රථ නොමැතිවීම හේතුවෙන් දැඩි අපහසුතාවට පත්ව සිටි අතර ජනතාවද පීඩාවට පත්ව සිටියහ.

උතුරු පළාත තුළ ලංගම බස්රථ වැඩවර්ජනයේ නිරත වුවද තමන් සාමාන්‍ය පරිදි බස්රථ ධාවනය කරන බව වවුනියාව පෞද්ගලික බස් සංගමය සඳහන් කළේය.

ඡායාරූප - රොමේෂ් මධුෂංක