නැගෙනහිර ඇෆ්ගනිස්තානයේ පොලිස් මූලස්ථානයකට අද (18) එල්ල වූ මරාගෙන මැරෙන බෝම්බ ප්‍රහාර පහකින් පස් දෙනකු මියගොස් තවත් විශාල පිරිසක් තුවාල ලැබූ බව වාර්තා වෙයි.

තලේබාන් සංවිධානය මෙම ප්‍රහාරය එල්ල කර තිබෙන අතර එක් බෝම්බකරුවකු පොලිස් මූලස්ථාන ගේට්ටුවේදී පුපුරණ ද්‍රව්‍ය පිරවූ මෝටර් රථයක් පුපුරුවා ගත් බව ද වාර්තා විය.
ප්‍රහාරය එල්ල වූයේ පක්තියා පළාතේ ගාර්දිස්හි පිහිටි පොලිස් මූලස්ථානයට යැයි ඇෆ්ගන් අභ්‍යන්තර කටයුතු අමාත්‍යාංශයේ ප්‍රකාශක නජීබ් ධනීෂ් මහතා පැවැසීය.

ගේට්ටුව අසළ බෝම්බය පුපුරා ගිය පසු ඉතිරි මරාගෙන බෝම්බකරුවන් 4 දෙනා පොලිස් මූලස්ථානය තුළට පැමිණ තිබෙන අතර පොලිස් වෙඩි පහරින් මරාගෙන බෝම්බකරුවන් දෙදෙනකු මියගොස් තිබේ.
පොලිස් නිලධාරීන් දෙදෙනකු මියගොස් තවත් පස් දෙනකු තුවාල ලැබූ බව ද අභ්‍යන්තර කටයුතු අමාත්‍යාංශයේ ප්‍රකාශකයා පැවැසීය. කෙසේ නමුත් පස් දෙනකුගේ මළ සිරුරු සොයාගත් බවත් 30කට ආසන්න පිරිසක් තුවාල ලබා සිටින බවත් නගරයේ රෝහලේ වෛද්‍යවරු පැවැසූහ.
ප්‍රහාරයේ වගකීම බාරගනිමින් තලේබාන් සංවිධානයේ ප්‍රකාශක සබිහුල්ලා මුජහීද් නිවේදනයක් නිකුත් කළ අතර බෝම්බ ප්‍රහාරවලින් පොලිස් නිලධාරීන් 100කට වැඩි පිරිසක් මියගිය බවත් තවත් විශාල පිරිසක් තුවාල ලැබූ බවත් පැවසීය.

කෙසේ නමුත් තලේබාන් සංවිධානය ඔවුන් එල්ල කරන ප්‍රහාරවලින් මියගිය සහ තුවාල ලැබූ සංඛ්‍යාව සත්‍ය සංඛ්‍යාවට වඩා වැඩියෙන් ප්‍රකාශ කරයි.   

(රොයිටර්-055)