(එම් .සුසිල් ප්‍රියන්ත සහ පිටිගල ඩී.ජේ.විජේසිංහ)

ඇල්පිටිය බස් නැවතුම්පොලෙන් දක්ෂිණ  අධිවේගී මාර්ගය ඔස්සේ කොළඹ දක්වා ධාවනය වන සුඛෝපභෝගී මගී ප්‍රවාහන බස් රථවල රියදුරු  සහ කොන්දොස්තරවරු අද (27 ) වර්ජනයක් ඇරැඹුහ.

බස් රථ ධාවනයවූ කාල සටහන ජාතික ගමනා ගමන කොමිෂන් සභාවෙන් වෙනස් කිරීමට විරෝධය පා ඔවුහු මෙසේ විරෝධය දැක්වූහ.

ජාතික ගමනා ගමන කොමිෂන් සභාව සමග අද (27 ) මේ සම්බන්ධයෙන් සාකච්ඡා කරන බවත් ඒ සදහා නිසිවිසදුමක් නොලැබුණ හොත් සිය වර්ජනය දිගටම කරගෙන යන බවත් ඔවුහු පැවසූහ.

කල් ඇතිව නොදන්නා කළ මේ බස් වර්ජනය නිසා දක්ෂිණ අධිවේගී මාර්ගයේ කොළඹ බලා යාමට උදේ පැමිණි රජයේ හා පෞද්ගලික ආයතනවල සේවකයෝ ඇතුළු ඇල්පිටිය හා ඒ අවට නගර වල මගීහු දැඩි අපහසුතාවකට පත්වී සිටියහ.

මේ සම්බන්ධයෙන් ජාතික ගමනා ගමන කොමිෂන් සභාවෙන් කළ විමසීමකදී එහි ප්‍රකාශකයකු කීවේ මේ සම්බන්ධයෙන් එම බස් රථවල රියදුරු කොන්දොස්තරවරු සමග සාකච්ඡා කර විසදුමකට ඒමට අපේක්ෂාවෙන් සිටින බවයි.