දේශපාලන උපදේශන සහ දත්ත විශ්ලේෂණ සමාගමක් වන ‘කේම්බ්‍රිජ් ඇනලිටිකා’ සමාගමේ කාර්යාල පරීක්ෂා කිරීම සඳහා බ්‍රිතාන්‍ය විමර්ශන නිලධාරීන් වරෙන්තු අපේක්ෂාවෙන් සිටින බව වාර්තා වේ. 
 
‘කේම්බ්‍රිජ් ඇනලිටිකා’ අනවසරයෙන් ෆේස්බුක් පරිශීලකයන් මිලියන 50කට ආසන්න පිරිසකගේ දත්තවලට අනවසරයෙන් ප්‍රවේශ වී ඇති බවට අනාවරණය වීමත් සමඟ ඔවුන් එලෙස වරෙන්තු ඉල්ලා ඇතැයි වාර්තා වේ. අදාළ සමාගම ෆේස්බුක් පරිශීලකයන්ගේ දත්තවලට අනවසරයෙන් පිවිස ඇති බව අනාවරණය කළේ බ්‍රිතාන්‍යයේ ‘චැනල් 4’ රූපවාහිනියයි. 
 
බ්‍රිතාන්‍ය  නියාමකයන් මෙලෙස වරෙන්තු ඉල්ලනු ලැබුවේ ඇමෙරිකා එක්සත් ජනපද හා යුරෝපීය නීති සම්පාදකයන් ‘කේම්බ්‍රිජ් ඇනලිටිකා’ සමාගම ෆේස්බුක් පරිශීලකයන්ගේ දත්තවලට පිවිසුණු බවට පළ වූ පුවත් වාර්තා සම්බන්ධයෙන් සවිස්තර පැහැදිලි කිරීම ඉල්ලීමෙන් අනතුරුවය. 
 
ඉකුත් 2016 වසරේ පැවැති ඇමෙරිකා එක්සත් ජනපද ජනාධිපතිවරණයේදී මෙම සමාගම එරට වත්මන් ජනාධිපති ඩොනල්ඞ් ට්‍රම්ප්ගේ මැතිවරණ ප්‍රචාරණ ව්‍යාපාරයට ද සම්බන්ධව කටයුතු කර තිබේ. ෆේස්බුක් සමාජ මාධ්‍ය සමාගමේ ක්‍රියාකාරකම් සම්බන්ධයෙන් පාපොච්චාරණයක් කරන්නැයි ද ඇමෙරිකා එක්සත් ජනපද කොංග්‍රස් සභාවේ සාමාජිකයන් ෆේස්බුක් සමාගමේ ප්‍රධාන විධායක නිලධාරී හා සම නිර්මාතෘ මාර්ක් සකර්බර්ගෙන් ඉල්ලා ඇත. 
 
‘කේම්බි්‍රජ් ඇනලිටිකා’ සමාගම සතුව තවමත් දත්ත තිබේදැයි සොයා බැලීම ‘සෝට්‍රෝස් ෆ්‍රීඞ්බර්ග්’ හි වෝහාරික විගණන නිලධාරීන්ට පැවරූ බව ෆේස්බුක් සමාගම සඳුඳා (19) නිවේදනය කළේය. 
 
 
රොයිටර්

055