(මනෝප‍්‍රිය ගුණසේකර සහ රන්ජන් කටුගම්පොළ)

මහ බැංකුවේ හිටපු අධිපති අර්ජුන් මහෙන්ද්‍රන් විදේශිකයකු වුවත් ඔහු ලංකාවේ නීතීයට යටත් අයකු වන හෙයින් කොමිසම හමුවේ පෙනී සිට සාක්කි දෙන ලෙසට කොමිසම විසින් නිකුත් කළ සිතාසියට ඔහු අවනත විය යුතු බව බැඳුම්කර කොමිසම අද(20) නිවේදනය කළේය.

අර්ජුන් මහෙන්ද්‍රන් කොමිසම හමුවේ පෙනී සිටිමින් සාක්කි දිය යුතු අයෙකු බව කොමිසමේ මතය බව සඳහන් කරන කොමිසම බැඳුම්කර සිද්ධිය සම්බන්ධයෙන් පැහැදිලි කිරීමට හැකියාව ඇති මෙම අවස්ථාව අත් හැරීමට තරම් අර්ජුන් මහෙන්ද්‍රන් අඥානයකු බව තමන් නොසිතන බවද එම නිවේදනයේ වැඩිදුරටත් සඳහන් කොට ඇත.

සිංගප්පුරු පුරවැසියකු වන මහ බැංකුවේ හිටපු අධිපතිවරයා බැඳුම්කර කොමිසම හමුවේ සාක්කි දීමට හෝ කොමිසමට සහායවීමට නීතීයෙන් බැඳී නැතත් කොන්දේසියක් මත කොමිසම හමුවේ සාක්කි දීමට කැමැත්ත පළකළ බවට ඔහු වෙනුවෙන් පෙනී සිටි ජනාධිපති නීතීඥ රොමේෂ් ද සිල්වා මහතා බැඳුම්කර කොමිසම හමුවේ කළ ප‍්‍රකාශයක් දක්වමින් මාධ්‍ය වල පළවු වාර්තා පිළිබඳව කොමිසමේ අදහස දැනුම් දෙමින් බැඳුම්කර කොමිසම නිකුත් කළ මාධ්‍ය නිවේදනයේ එසේ  සඳහන් කොට තිබිණි.

‘‘මහ බැංකුවේ හිටපු අධිපති අර්ජුන් මහෙන්ද්‍රන් විදේශිකයෙකු වීමේ හේතුව මත ඔහු අපගේ බලඅධිකාරියෙන් පිටස්තර පුද්ගලයෙකු වශයෙන් සැළකිය නොහැකි බවත් කොමිසම හමුවේ පෙනී සිට සාක්කි දෙන ලෙසට කොමිසම විසින් නිකුත් කළ සිතාසියට ඔහු අවනත විය යුතුයි. අර්ජුන් මහෙන්ද්‍රන් ශ්‍රී ලංකා මහ බැංකුවේ අධිපතිධුරය බාරගැනීමෙන් පසු ඔහු අපේ නීතීයෙන් පරිබාහිර පුද්ගලයෙකු වශයෙන් සැළකීමට හැකියාවක් නැති අතර ඔහුගේ ස්ථාවරය හා අර්ජුන් ඇලෝසියස්ගේ ස්ථාවරය බෝහෝ සෙයින් එකිනෙකට වෙනස්ය‘‘ යැයි ද එහි සඳහන්ය.