(ඉන්දිකා රාමනායක)
 
බීමත් රියදුරන් අත්අඩංගුවට ගැනීම සදහා  රට පුරා කි‍්‍රයාත්මක කළ මෙහෙයුමේ දී මසක් තුළ අත්අඩංගුවට ගත් රියදුරන් අධිකරණයට ඉදිරිපත්  කිරීමෙන්  රුපියල් කෝටි 19 ට ආසන්න මුදලක් රජයට උපයා දී ඇති බව රථවාහන පොලිසිය කියයි.
 
 ඉකුත් ජුලි මස 5 වැනි  සිට අගෝස්තු මස 5 වැනි දින දක්වා කි‍්‍රයාත්මක කළ  මෙම මෙහෙයුමේ දී බීමත් රියදුරන් 7318 දෙනෙකු අත්අඩංගුවට ගෙන ඇති අතර ඔවුන් අධිකරණයට ඉදිරිපත් කරමින් මෙම මුදල්  උපයාගෙන ඇති බව රථවාහන පාලන හා මාර්ග ආරක්ෂාව බාර නියෝජ්‍ය පොලිස්පති අජිත් රෝහණ මහතා පැවසීය.
 
මෙම මෙහෙයුමේ දී වැඩිම  පිරිසක් අත්අඩංගුවට ගෙන ඇත්තේ කොළඹ ප‍්‍රදේශයේ බවත්  මේ අතර  වැඩි  පිරිසක්  ති‍්‍රරෝද රථ රියදුරන් හා   යතුරුපැදිකරුවන්  බවද   අජිත් රෝහණ මහතා කීය.
 
රථවාහන පාලනය හා මාර්ග ආරක්ෂාව බාර  නියෝජ්‍ය පොලිස්පති  අජිත් රෝහණ මහතාගේ  උපදෙස් මත එහි අධ්‍යක්ෂ  පොලිස් අධිකාරි ඉන්දික හපුගොඩ මහතාගේ මෙහෙයවීමෙන් මෙම මෙහෙයුම් අඛණ්ඩව තවදුරටත් කි‍්‍රයාත්මක කෙරේ.