(බිමල් ෂ්‍යාමන් ජයසිංහ)

ඉන්දියාවේ දී ඝාතනයට ලක්වූ බව කියන සංවිධානාත්මක අපරාධ කල්ලි නායකයෙකු වූ  ලසන්ත චමින්ද පෙරේරා නොහොත් අංගොඩ ලොක්කා නැමැත්තා බලහත්කාරයෙන් තම ඉඩම් ලියා ගත්තැයි පවසා එම ඉඩම් හිමිකරුවන් ගෙන් මේ වන විට පැමිණිලි තුනක් ලැබී ඇතැයි බස්නාහිර පළාත් දකුණ අපරාධ කොට්ඨාසය කියයි.

එම පැමිණිලිකරුවන් මුල්ලේරියාව පොලිස් වසමේ පදිංචිකරුවන් බව පොලිසිය පවසයි.

පර්චස් සීයකට අධික ප්‍රමාණයකින් යුත් ඉඩමක් කිසිදු මුදලක් නොගෙවා බලහත්කාරයෙන් ලියා ගත් බවත්, පර්චසය රුපියල් ලක්ෂ තුනක් වටිනා ඉඩමක් ,පර්චසය රුපියල් ලක්ෂ දෙක බැගින් ලබා දී ලියා ගත් බව හා කෝටි හතරක් පමණ වටිනා ඉඩමක් ලක්ෂ අසූ පහක් දී ලියා ගත් බවත් එම පැමිණිලිවල සඳහන් වන බව පොලිස් නිලධාරියෙක් පැවැසීය.

ඊට අමතරව එක්කෝටි පනස් ලක්ෂයක් පමණ වටිනා නිවසක් සහිත ඉඩමක් රුපියල් ලක්ෂ 90 ක් ලබා

දී බලහත්කාරයෙන් ලියා ගෙන ඇති බවට සිදු කළ මූලික විමර්ශන වලදී අනාවරණය වී ඇතැයි පොලිසිය කියයි.

එම ඉඩම අංගොඩ ලොක්කාගේ අනියම් පෙම්වතිය බව කියන අමානි ධනංජි  මුකරියා  නමට ලියාගෙන ඇති බවට විමර්ශන වලදී හෙළි වූ බව පොලිසිය පවසයි.

ඊට අමතරව සහෝදරීගේ නමට හා පාතාල සාමාජික සිම්බු සමන්ත ඇතුළු ගෝලබාලයන්ගේ නමටද එම ඉඩම් ලියාගෙන  ඇති බව ඇති බව පොලිසිය කියයි.