" මගේ හබියා ස්වර්ණ පුස්තක අවසන් වටයේ පොත් දහයම මට ගෙනත් දුන්නා. අපේ ඇඳ ගාව මේ බලන්ඩකො."

ඇඳ ළඟ ස්ටූලයක තබා ඇති උස පොත් මිටියේ ඡායාරූපයක් ද ෆේස්බුක් පිටුවේ පළ කර ඇත. එය මහ රැ බෙඩ්ලෑම්ප් එළියෙන් ගත් පින්තූරයකි. ඇගේ ‍බෙසියරයක් ද ඇඳ උඩ වැටී තිබේ. සමහර විට ඇය එය හිතාමතා එතැන තබා මොබයිල් ෆෝනයේ කැමරාව ක්‍රියාත්මක කරන්නට ඇත.

ෆේස්බුක් සන්තෘෂ්ටියේ උපරිමාස්වාදය විඳිමින් සිටි මෙලනි සිය සැමියාට සවන් දෙන බවක් පෙනෙන්නට නොතිබුණි. ඖෂධවේදියකු වූ ඩග්ලස්ට හැඟුණේ ඇය සිංහල සාහිත්‍යය මගින් චරිතය කෙලෙසා ගන්නා බවකි.

නිදා ගන්නට තැත් කළ ද අවුල් කල්පනාවේ ගැලුණු ඔහුට නින්ද ගියේ නැත. බොහෝ වේලාවක් ඇඳ මත පෙරළුණු ඔහු නැගිට බිත්තියට හේත්තු වී හිස් බැල්මෙන් අඳුරු විදුරු කවුළුව දෙස බලා සිටින්නට විය.

ඇයට ෆේස්බුක් මිතුරු මිතුරියෝ බොහෝ ගණනක් සිටිති. ඇය එහි සිය ප්‍රධාන ඡායාරූපය ලෙස රඳවා තිබෙන්නේ ලෝකය විනිවිද පෙනෙන බව හඟවන වීදුරුමය කෘමි දෙනෙතකි.

ඇය බොළඳ තැනැත්තියක බවට පත් කරනු ලැබුවේ එංගලන්තයේ දී ඔවුන් දෙදෙනා අතරට පැමිණි සූරිය සුගුණසිරි විසින් බව සිතෙන සෑම මොහොතක දී ම ඔහුට සාහිත්‍ය කලා  අධ්‍යාපනය ගැන ඇති වන්නේ කලකිරීමකි.ඔහුට සිතෙන්නේ සාහිත්‍ය කලා අධ්‍යාපනය  විද්‍යා අධ්‍යාපනයට වඩා හාත්පසින් වෙනස් එකක් බවය.

මෙලනි ගැන ඇති වුණු අප්‍රසාදය නිදා ගැනීමට බාධා කරන තරමේ හැඟීමක් බවට පත් වූ විට ඔහු හෙමින් සීරුවේ මිදුලට පිය නැගීය. තරු පිරි අහසින් වුව වහා දෙනෙන අහකට ඇද ගත් ඔහු අඳුරු රාත්‍රිය දෙස පමණක් බලා සිටියේය.

අලුයම් කාලය මෝදු වන විට ගෙතුළට පැමිණි ඔහු තම බිරිඳට නොහැගෙන පරිදි ඇඳෙහි වැතිරුණේ ය. තමාට සිදු වෙමින් පවතින්නේ ගෙවී යන මැදිවිය සමඟ සමහර පිරිමින්ට ඇති වන පුරුෂ ශක්තිය හීනවීමක් විය හැකි බව ඔහුට සිතිණ. බිරිඳට එරෙහි සිතක් තමා තුළ පහළ වන්නේ ඇගේ සදාචාරයේ වරදක් නිසා නොව තමාගේ ශාරීරික දුර්වලතාවක් හා මානසික පසුබෑමක් නිසා විය හැකි ය.

ඔහුට පෙනුණේ රූමතියක වූ තම බිරිඳ තව තවත් සරාගික වී ඇති බවකි. සයනය මත සැතැපෙන ඇගේ සිරුර එංගලන්තයේ කලාගාරවල නිතර දකින්නට හැකි සුන්දර නිරුවත් රූපයකට සමානය. නින්දේ දී වුව ඇගේ සිරුරේ රැඳෙන ස්පන්දනය කවරකු තුළ වුව ද ලිංගික උද්දීපනයක් ඇති කරන්නකි. ඔහුට හැඟුණේ තමාගේ ඖෂධවේදී වෘත්තීය සහ විද්‍යාවේදී මානසික හැඩගැස්ම ඇයට බැරෑරුම් වැඩි බවකි.

පේරාදෙණි සරසවියේ වෛද්‍ය පීඨයේ ශිෂ්‍යයෙකුව සිටි සමයේ ඔහු දුටු සරච්චන්ද්‍ර සම්බන්ධයෙන් තිබුණු ගෞරවය ගාලු මුවදොර ඛණ්ඩාරනායක ප්‍රතිමාව අසල තවත් එවැනි ප්‍රතිමාවක් තැනිය හැකි ආකාරයේ එකක් විය. එම්. ඒ. උපාධිය සඳහා එංගලන්තයට පැමිණි සූරිය සුගුණසිරි ඒ සාහිත්‍ය කලා පරමාදර්ශයෙන් සුනුවිසුනු කරන මට්ටමේ මැට්ටකු වූ අයුරු ඔහු සිහිපත් කළේ කලකිරීමකින් යුතුව ය.

මිටි මහත දුම්රිය කම්කරුවකු මෙන් ශක්තිමත් මිනිසකු වූ සූරිය සුගුණසිරි ටික දවසකින් ම ඔවුන්ගේ පවුලේ අතවැසියා බවට පත් විය. මෙලනි පසුපසින් සුපර් මාර්කටයට යන ඔහු බඩුමුට්ටු කර ගසා ගෙන එයි. ගෙදරදොර සියලු වැඩ කරනු ලැබුවේ ඔහු විසිනි. තට්ටු නිවාසයේ පදිංචි අසල්වාසීන් කල්පනා කළේ ඔහු ලංකාවෙන් ගෙන්වා ගන්නා ලද මෙහෙකාරයකු බව ය. තද සීතලේ වුවත් කොට කලිසම ඇඳීමට පුරුදු වුණු ඔහු පොතක් පතක් බැලුවේ කලාතුරකිනි.

මුදල් අගහිඟකමක් නැති සූරිය සුගුණසිරි මාසයකට දෙකකට වරක් ලංකාවෙන් විශාල බඩු පෙට්ටියක් ගෙන්වා ගත්තේ ය. කැවිලි පෙවිලිවල සිට රාණී සබන් කැටය දක්වා සියලු සිල්ලර කළමනා එහි විය. සිංහල පත්තර මිටිය වෙනම තැපෑලෙන් ලැබුණේ ය.

ඔහු ඩග්ලස් වෙතින් බලාපොරොත්තු වුණේ එකම එක දෙයකි. ඉංග්‍රීසි පොත් කියවා තේරුම් කරවා ගැනීම සහ උපාධි ප්‍රබන්ධය ඉංග්‍රීසියෙන් ලියවා ගැනීම ඔහුගේ බලාපොරොත්තුව වී තිබිණ. ඩග්ලස්ට සිතුණේ ඔහු බ්‍රෝඩ්වෙි තියටරයේ පෙන්වන ශේක්ස්පියර් නාට්‍යයක පිළිබිඹු වන ආකාරයේ සාමාන්‍ය පුරවැසි චරිතයකට සමාන පුද්ගලයකු බව ය.

තම යුතුකම නොපිරිහෙළා ඉටු කළ ඩග්ලස් ඔහුගෙන් මහත් ගෞරව ප්‍රශංසා ලැබීය. ඔහු ඩග්ලස් ඇමතුවේ ඩොක්ටර් යනුවෙනි. ඩග්ලස්ගේ පමණක් නොව මෙලනිගේ හා දරුවන්ගේ ඇඳුම් පවා ඔහු සෝදා දුන්නේ ය. එක් නිවාඩු කාලයක දී ඔහු ගෙදර නතර කර අයර්ලන්තයට යෑමට ඩග්ලස්ට හා මෙලනිට හැකි විය.

කවර ඔලමොට්ටලකම් තිබුණ ද ඔහු සැබෑ රසිකයෙක් විය. මෙලනි සමඟ ගී සින්දු රස විඳි ඔහු ඒවාගේ සියුම් සැගවුණු තැන් ඇයට පහදා දුන්නේ ගුවන් විදුලි නිවේදකයකුගේ මුඛරිකමිනි. ඔහුගේ සිරුරේ නොමැති මනබඳිනසුලු ගතියක් ඔහුගේ කටහඬෙහි රැඳි තිබිණ.

ලංකාවට පැමිණි පසු ඔහු සමඟ පැවැති ඇසුර දුරකථන කතාබහකට සීමා වුණු නමුත් මෙලනි ඔහු නිසා සිංහල නවකතා කියැවීමට නැඹුරු වී ඇති බව ඩග්ලස් දුටුවේ ය. කොයිතරම් නවකතා කියවන නමුත් ඇගේ සාහිත්‍ය සිතුවිලි ගැඹුරු නොවන්නේ මන්දැයි ඔහුට තේරුම් ගත නොහැකි විය.

ඒ සියල්ලට වඩා ඔහුට ලජ්ජා සිතුණේ පාඨක සමාජය ඉදිරියේ ඇය තමාව හබියා යැයි ඇමතීම ගැන ය. ඇගේ ෆේස්බුක් මිතුරන් විසින් තමා ඇගේ හබියා ලෙස හඳුනාගැනීම ගැන ඩග්ලස්ගේ සිතෙහි ඇති වුයේ තරහවකි.

ඒ අමනාපය සැඟවී පවතින අතරේ මෙලනිගේ ෆේස්බුක් විප්ලවය සිදු වූයේ කිසිවකු බලාපොරොත්තු නොවුණු අයුරිනි. එය ලංකාවේ සාහිත්‍ය මාසය විය. ජාතික මට්ටමේ සාහිත්‍ය තරග දෙකක දී හොඳම නවකතා ලෙස තේරෙන පොත් මොනවාදැයි ඇය තම ෆේස්බුක් පිටුවෙන් හෙළිදරව් කළාය.

"මෙන්න යාළුවනේ හොඳම නවකතාව".

එක් තරගයක දී ඇය කල් ඇතිව ප්‍රකාශ කළ කවි පොතට සම්මාන හිමි විය. එය වට තුනකින් පවත්වන ලද තරගයකි. ඇය පළමු වටයේ ප්‍රතිඵල පවා හෙළිදරව් කළාය.

ඇතේ ප්‍රතිඵල හුදු පේන කීමක් නොවන බවත්, රහසිගත මාර්ගයකින් ලබා ගන්නා තොරතුරු බවත් කාටත් අවබෝධ විය. එතැන් සිට ඇය විවේචනයටත්, අවමානයටත් ලක්වන අයුරු දුටු ඩග්ලස් අසහනකාරි හැඟුමකින් වෙළී ගියේ ය.

මෙලනි මොකක් ද මේ ඔයා කරන පිස්සු වැඩේ? ඔය සෙල්ලම නතර කරන්න......... නවකතාවක් ගැන තීරණ දෙන්න ඔයාට දැනුමක් තියනවයැ.

ඩග්ලස්ගේ ඒ චෝදනාවට ඇය පිළිතුරු දුන්නේ  සෙල්ලක්කාර ගතියකිනි. 

ඊළඟ උත්සවේ ප්‍රතිඵලත් මං ළඟ තියෙනවා ............මං.හෙට ඒ ප්‍රතිඵලත් මගේ ෆේස්බුක් පිටුවේ දානවා."

ඇගේ සැහැල්ලු ස්වරය ඩග්ලස් තවත් කෝප ගන්වනසුලු විය.

"මීට පස්සේ මං ඔයාට කිසිම පොතක් ගෙනත් දෙන්නේ නැහැ. පන්සලකට දෙන්නවත් මට පූජාවලියක් ගේන්න කියන්න එපා. ඩග්ලස් කෝපයෙන් පැවැසුවේ ය.

මගේ ෆේස්බුක් යාළුවෝ මගේ හබියා ගැන දන්නවා. ඔයාට ඒ ගොල්ලන්ගෙන් බැණුම් අහන්න වෙයි. තාරු කියලා කොටි දෙනක් ඉන්නවා. ඒකී ඔයාව කයි. මාව කන්න පැනපු වෙලේ සේන මල්ලි තමයි මාව බේර ගත්තේ." මෙලනි පැවැසුවේ ඇගේ ෆේස්බුක් පාඨක සමාජය සංකීර්ණ එකක් බව ඩග්ලස්ට දැනුම් දෙමිනි.

ඔයා කොහොම ද හරියටම ප්‍රතිඵල දෙන්නේ?" ඩග්ලස් කුතුහලයෙන් ඇසුවේ ය.

"සූරි මල්ලීට බොරු කියන්න බැහැ. අහපු ගමන් කියනවා.......... මතක නේද එංගලන්තෙදී කරපු වැඩ. සුද්දියෙක් එක්ක මහ රෑ පාරේ වතුර මලකින් නාලා නියුමෝනියාව හදා ගත්තෙ." මෙලනි පැවැසුවේ සූරිය සුගුණසිරි පිළිබඳව තවම
නොමැකුණු සිහිවටන ඔප දමමිනි. "මෙලා ඔයාට පිස්සු ද? මිනිහා දැන් මහාචාර්ය වරයෙක්. ඔයා ඒ මනුස්සය අමාරුවේ දානවා.

සූරිට ඕවයෙ ගාණක් නැහැ. මට අද තව තොරතුරු එනවා."

ඩග්ලස්ට හැඟුණේ සිය බිරිඳගේ බොළඳකම් සැඟවිය නොහැකි තරමට විනිවිද පෙනෙනසුලු බවය.ඔහු පරිගණකය සහිත සිය ලියන කාමරයට ගොස් දොර වසා ගත්තේ ය.

ඇය යළිත් සූරිය සුගුණසිරිට දුරකථන ඇමතුමක් ලබා ගන්නා හඬත්, ඔහු වෙතින් තවත් තරග ප්‍රතිඵලයක් ලබා ගන්නා අයුරුත් ඩග්ලස්ට ඇසිණි. ඔහුට හැඟුණේ ඔවුන් දෙදෙනා දුරකථනයෙන් එකතු වී කතා කිරීමෙන් ඉමහත් ආස්වාදයක් විඳින බවකි.
ඉංග්‍රීසි පොතපත කියැවීමෙන් සහ සිංහල නාට්‍ය නොකඩවා නැරඹීමෙන් සාහිත්‍ය නිර්මාණ කියැවීම පිළිබඳව කිසියම් නිපුණතාවක් ලබා සිටි ඩග්ලස්ට හැඟුණේ සිංහල නවකතා කියැවීමට ඉතා කුඩා වෑයමක් ප්‍රමාණවත් බව ය. එය සෙම්ප්‍රතිශ්‍යාවෙන් කිසිවකුට සහනයක් ලබා දෙන පස්පංගුව පානය කිරීම වැනි දෙයකි.

ටික වෙලාවකට පසු සිය බිරිඳගේ ෆේස්බුක් පිටුව කියවන්නට පටන් ගත් ඔහු දුටුවේ ඉතා අසභ්‍ය මට්ටමේ ඕපාදූප සහිත කොමෙන්ට් රාශියකින් පාඨකයන් ඇයට ප්‍රතිචාර දක්වා ඇති බව ය. මෙලනි සහ සූරිය ගුණසිරි අතර අනියම් සබඳතාවක් ඇතැයි සැක කරමින් ලියන ලද කොමෙන්ට් ප්‍රසිද්ධ වැසිකිළි බිත්තිවල ලියන දේවල් තරම් අශෝහන විය.

ඇගේ ‍හබියා පොන්නයකු බව පැවැසූ එක් ෆේස්බුක් පාඨකයකු 'කකල්ඩ්' යන ඉංග්‍රීසි වචනයේ තේරුම මලලසේකර ශබ්දකෝෂයේ දෙසිය හැට හතර පිටුවෙන් උපුටා පළ කර තිබිණ.

' cuckold (කකල්ඩ්). අනාචාර ගැහැනියගේ සැමියා'

අමූලික බොරු වටා ගෙතුණු ඒ ෆේස්බුක් සටහන් කියැවූ ඩග්ලස්ට හැඟුණේ සාහිත්‍ය ලෝකය තුළ නන්නාදුනන චරිතයක් වූ තම බිරිඳ ලබනවාට වඩා වැඩි අවමානයක් ප්‍රසිද්ධ සාහිත්‍ය මහාචාර්යවරයකු වන සූරිය සුගුණසිරි අත්විඳින බවකි.