රජයේ වටිනා ඉඩම් ඇතැම් දේශපාලකයන් විසින් තෑගි භාණ්ඩ වශයෙන් යොදාගන්නා ලද අවස්ථා මේ රටේ හිඟ නැත. එවැනි අක්‍රමිකතා නැති කරන බවට පොරොන්දු ලබා දෙමින් බලයට පැමිණෙන දේශපාලකයන්ම යළි යළිත් එම වැරැද්දම කිරීම රටේම අවාසනාවකි. අපට මේ වැරැද්ද යළි මතක් කර දීමට සිදු වූයේ අනුරාධපුර දිස්ත්‍රික්කයෙන් වාර්තා වූ මේ හා සම්බන්ධ ප්‍රවෘත්තියක් පාදක කරගෙනය.

මහවැලි අධිකාරිය හරහා මේ ආකාරයට රජයේ වටිනා ඉඩම් දේශපාලන හිතවතුන්ට බෙදා දෙන බව එම ප්‍රවෘත්තියේ සඳහන්ය. දේශපාලන හිතවතුන්ගේ පහනෙන්ම එළිය බැලූ මහවැලි නිලධාරීන් ද ඒ ආකාරයට ඉඩම් බෙදාගෙන ඇති බව ද හෙළි වී තිබේ.

මේ ඉඩම් මහවැලි එච්. කලාපයේ තඹුත්තේගම, නොච්චියාගම හා ගල්නෑව නගරවල පිහිටි ඒවා බව ද කියයි. නගරාසන්න වීම නිසා බැලූ බැල්මට මේ ඉඩම් ඉතා වටිනා ඒවා විය යුතු බවට සැකයක් නැත.

රහසිගතව සිදුවී ඇති මේ දූෂිත ඉඩම් ගනුදෙනුවේ දී පර්චස් 10 සිට 20 දක්වා ඉඩම් කැබලි 100 කට ආසන්න ගණනක් බෙදා දී සහ බෙදාගෙන ඇතැයි ද දැනගන්නට තිබෙන අතර අනුරාධපුර දිස්ත්‍රික්කයේ මැති ඇමැතිවරුන්ගේ ලැයිස්තුවල පිරිසකටත් පොළොන්නරුවේ දේශපාලන ආධාරකරුවන් පිරිසකටත් මේ ඉඩම් ලොතරැයිය ඇදී තිබේ.

අදාළ රහසිගත දූෂිත ඉඩම් කච්චේරි පවත්වා ඇත්තේ ජනාධිපතිවරයා විසින් මහවැලි අධිකාරිය හරහා ඉඩම් බෙදාදීම ඉකුත් නොවැම්බර් 11 වැනිදා සිට තහනම් කර ඇති පසුබිමක වීම මෙහි ඇති ලොකුම ඛේදවාචකයයි. රහසින් හෝ ඉඩම් කැබැල්ලක් ලැබෙනවා නම් ජනාධිපතිවරයාගේ තහනම ගණන් ගන්නේ කුමටදැයි ඔවුන් සිතනවා විය යුතුය. එහෙත් මෙලෙස රජයේ ඉඩම් හොර පාරෙන් තමන් සන්තක කර ගැනීම විලි ලජ්ජා නැති වැඩක් බව කිව යුතුය.

රජයේ ඉඩම් නීතිවිරෝධී ජාවාරමක භාණ්ඩ වශයෙන් යොදා ගත්තේ කවුරුන්දැයි වහාම සොයා බැලීම වගකිවයුත්තන්ගේ රාජකාරියකි. එහෙත් වගකිවයුතු අය ද මේ ඉඩම් කැබලි නීතිවිරෝධී ලෙස බෙදාදීමට හවුල් වී ඇත්නම් එවැනි සොයා බැලීම් කවදාවත් සිදු නොවන බවත් නියතයකි.

මීට පෙර කාලවල දී සාමාන්‍යයෙන් සිදු වූයේ මන්ත්‍රීවරුන්ගේ ලැයිස්තුවලට රැකියා ලබාදීමය. එහෙත් මෙහිදී සිදුවී ඇත්තේ මන්ත්‍රී ලැයිස්තුවලට අනුරාධපුර නගරාසන්න ඉඩම් ලබාදීමය. එසේ ලබා දෙන්නේ මන්ත්‍රීලාගේ අම්මාගේ අප්පාගේ බූදලයෙන් නොවන බවත් රජයට අයිති ඉඩම් බවත් ඉඩම් ලබන සහ ඉඩම් ලබාදෙන අය දැන සිටිති. තමන්ට ලැබෙන්නේ වටිනාකමින් වැඩි ඉඩම් බව ද දන්නා ඔවුන් ඒවා වෙන්කර ගැනීම සඳහා මහවැලි නිලධාරීන්ට සන්තෝසම් ලබා දීමට වුවද පැකිලෙන්නේ නැත. දැනටමත් එවැනි එක් නිලධාරියකු සම්බන්ධයෙන් තොරතුරු ලැබී ඇති බවත් සඳහන් වෙයි. 

මහවැලි අධිකාරියේ ආරංචි මාර්ගවලින් හෙළි වී ඇත්තේ මන්ත්‍රීවරුන්ගෙන් නම් ලැයිස්තු ලබාගෙන පදිංචිය සඳහා නේවාසික ඉඩම් නොමැති තැනැත්තන්ට ඒවා ලබාදීමට මෙසේ විශේෂ තේරීම් යටතේ රහසිගතව ඉඩම් කච්චේරි පැවැත්වීමේ කටයුතු සිදුවී ඇත්තේ ප්‍රධාන පෙළේ අමාත්‍යවරයකුගේ උපදෙස් මත බවය.

ජනාධිපතිවරයාගේ තහනම් නියෝගයක් උල්ලංඝනය කිරීමට තරම් බලවත් මේ අමාත්‍යවරයා කවුදැයි වහාම සොයා බැලීම අවශ්‍ය නොවන්නේ ද? මේ සම්බන්ධයෙන් මහවැලි අධිකාරියේ ඉහළ නිලධාරීන් කිහිප දෙනකුගෙන් ලංකාදීපය කළ විමසීම්වල දී එම නිලධාරීන් ප්‍රකාශ කර තිබුණේ මේ ඉඩම් බැහැර කිරීම් විනිවිදභාවයෙන් යුතුව සිදුකර ඇති බවය.

ඒ අතර මහවැලි අධ්‍යක්ෂ ජනරාල්වරයා සඳහන් කර ඇත්තේ ජනාධිපතිවරයා විසින් නවත්වා තිබීම හේතුවෙන් මේ වනවිට ඉඩම් බෙදාදීම්, බැහැර කිරීම් කිසිවක් කළ නොහැකි බවය. එසේ නම් එම නියෝගවලට පටහැනිව මේ ආකාරයට කටයුතු සිදුවන්නේ කෙසේද? 

රජයට අයත් ඉඩම් බෙදාදීම සඳහා පිළිගත් ක්‍රමවේදයක් පැවතිය යුතු බව අපි පිළිගනිමු. එහෙත් එසේ ඉඩම් ලබා දිය යුත්තේ ඉඩම් සහ වෙනත් දේපළ අයිති පුද්ගලයන්ට නොවීම ද අවශ්‍යය. අප මෙහිදී සලකා බලන්නේ මහා පරිමාණයෙන් සිදුවන ව්‍යාපාරික කටයුතු සහ විදෙස් ආයෝජන සම්බන්ධ ව්‍යාපෘති සඳහා ඉඩම් පවරා දීම සම්බන්ධයෙන් නොවේ. පොදු ජනතාවගේ අවශ්‍යතා සඳහා ලබාදෙන ඉඩම් කට්ටි සම්බන්ධයෙනි. ඒ සඳහා මේ රටේ පවතින එකම ක්‍රමවේදය බලයේ සිටින දේශපාලකයන් පසුපස යාම පමණක් බව ප්‍රකට රහසකි. 

(***)