ආර්.එම්.වී. කන්තෝරුව කියා පොදුවේ හඳුන්වන මෝටර් රථ ප්‍රවාහන දෙපාර්තමේන්තුව මේ රටේ සොරකම්, දූෂණ සහ අක්‍රමිකතා අතොරක් නැතුව සිදුවන රජයේ ආයතනයක් වශයෙන් සමාජයේ කතා බහට පත්ව ඈත. අතීතයේ සිටය. මේ අකටයුතුකම් වැඩක් කර ගැනීමට පැමිණෙන ජනතාව එම ආයතනයට ඇතුළු වීමටත් පෙර සිටම ආරම්භ වන බව චිර ප්‍රසිද්ධය.

එතරම් දැනුමක් නොමැතිව එතැනට පැමිණෙන ඇතැමුන්ට සිදුවන්නේ වටේ සිටින ආර්.එම්.වී. කාක්කන්ගේ ගොදුරක් බවට පත්වීමටය.

ඇතුළට ගිය විටද ඇතැම් අවස්ථාවල දී ඔවුහු අපහසුවට පත්වෙති. වංචනිකයන්ට ගොදුරු වෙති. එළියේත් ඇතුළේත් පිරිස් එකට සංවිධානය වී මේ වංචා සිදු කරන බවට නැගෙන චෝදනා බොහෝය.

කාලයක් තිස්සේ පැවති එම තත්ත්වයට වරින් වර පිළියම් යෙදීම ද සිදුවිය. ඒ හේතුවෙන් තරමක් දුරකට වංචනික ක්‍රියා නැවතී තිබේ. නිවැරදි ක්‍රියා පිළිවෙත අනුගමනය කර තමන්ගේ වැඩේ කරගෙන පිටව යාමට බොහෝ දෙනකුට හැකියාව ලැබී තිබෙන්නේ ඒ හේතුවෙනි. එහෙත් එම කාර්යාලයේ ඇතුළත ඇතැම් වංචනික පිරිස් පිටත කණ්ඩායම් සමඟ එක්වී කරන වංචනික ක්‍රියා වරින් වර මාධ්‍යයේ සිරස්තල මවයි. පසුගියදා අපගේ ලංකාදීප පුවත්පත තම ප්‍රධාන සිරස්තලයෙන් එවැනි වංචනික ක්‍රියාවක තතු හෙළි කර තිබිණි.

එම ප්‍රවෘත්තියට අනුව මෙරට ධාවනය වන වාහන 400 කට අධික සංඛ්‍යාවක් ලියාපදිංචි කර ඇත්තේ ව්‍යාජ පුද්ගලයන්ගේ නම් වලිනි. මේ වංචාව හෙළි කරගෙන තිබුණේ පානදුර වලාන දූෂණ මර්දන ප්‍රහාරක ඒකකය මගිනි. එහිදී සිදුවී ඇතැයි පැවසෙන්නේ භාවිතයට නුසුදුසු බවට නිර්දේශ කරමින් ධාවනයෙන් ඉවත් කරන වාහන අංකවල නියම හිමිකරුවන්ගේ නම් ඉවත් කර වෙනත් පුද්ගලයන්ගේ නම් ඇතුළු කිරීමය.

මෙසේ වෙනත් නම් ඇතුළු කිරීමේ දී අදාළ පුද්ගලයන්ගෙන් මේ සඳහා රුපියල් ලක්ෂ ගණනින් මුදල් ලබාගෙන මේ වංචාව සිදු කර තිබේ. මෝටර් රථ ප්‍රවාහන දෙපාර්තමේන්තුවේ පිරිසක් සම්බන්ධ වී මේ වංචාව කාලයක් තිස්සේ සිදු කරගෙන ගොස් ඇති බව ද පොලීසිය සොයාගෙන තිබිණි.

මේ වංචාවේ ආදායම කොතරම් සරුදැයි කිවහොත් ඊට සම්බන්ධ එක් පුද්ගලයකු භාවිත කළ මෝටර් රථය රුපියල් කෝටි දෙකකට ආසන්න වටිනාකමකින් යුත් සුඛෝපභෝගී රථයකි. මේ පුද්ගලයා මෝටර් රථ ප්‍රවාහන දෙපාර්තමේන්තුවේ ලේඛනාගාර දෙපාර්තමේන්තු සේවකයකු බව කියැවෙයි. මෙවැනි වංචාවලට සම්බන්ධ වන පුද්ගලයන් මෙහි සෑම අංශයකම සිටිය හැක. මෙබඳු අක්‍රමිකතා කිරීම තනිව කළ හැකි කාර්යයක් නොවේ. ඒවා සිදුවෙන්නේ සංවිධානාත්මක මට්ටමකිනි.

මේ වංචනික ක්‍රියා සඳහා ආධාර සහ අනුබල දෙන ඉහළ මට්ටමේ පිරිස් ද සිටින බවට සැකයක් නැත. ලක්ෂ ගණනින් ගාණ කැපෙන විට ඔවුන්ගේ සාක්කුවලට ද එයින් කොටසක් වැටෙයි. එසේ නොවී දීර්ඝ කාලයක් මෙවැනි වංචාවක් පවත්වාගෙන යාමට හැකියාවක් නැත.

මේ පිළිබඳ සිදු කරන ඉදිරි විමර්ශනවල දී ඒ පිළිබඳ තොරතුරු හෙළිවනු ඇත. එසේ නොවී ඇතැම්විට දැනට සිදු කෙරෙන පරීක්ෂණ අතරමග නැවැත්වීමට ද ඉඩ තිබෙන බවත් කිව යුතුය. අද අපේ රටේ මුල් බැසගෙන තිබෙන වංචාවේ දූෂණයේ තරම එතරම් බලවත්ය.

සාමාන්‍යයෙන් රාජ්‍ය ආයතනවල සේවය තෝරාගැනීමේදී බොහෝ දෙනකුගේ ඉහළම කැමැත්ත හිමිවන දෙපාර්තමේන්තු ගණනාවක් තිබේ. ආර්.එම්.වී. කන්තෝරුව එයින් එකකි. ආගමන විගමන, පුද්ගලයන් ලියාපදිංචි කිරීම තවත් එවැනිම දෙපාර්තමේන්තු දෙකකි. මේවාට පැන ගැනීමට බලාපොරොත්තු වන ඇතැමුන්ගේ මූලික අරමුණු අතර අයථා ක්‍රමවලින් ධනය රැස් කිරීම අංක එකට තිබේ. තමන්ට හිතවත් දේශපාලනඥයන් හරහා බලපෑම් කර මෙවැනි දෙපාර්තමේන්තුවලට ඔවුන් රිංගන්නේම ඒ අදහස සිතේ තබා ගනිමිනි. නීතිවිරෝධී ක්‍රියා කරන පුද්ගලයන්ට ඇතැමුන්ගේ රැකවරණ ලැබෙන බැවින් ඔවුන් අල්ලා ගැනීම ද පහසු නැත.

මේ තත්ත්වය වෙනස් කර ආර්.එම්.වී. කන්තෝරුව වැනි දෙපාර්තමේන්තුවල කීර්තිනාමය ආරක්ෂා කර ගැනීමට වහා පියවර ගත යුතුය. වංචනික ක්‍රියාවලට සම්බන්ධ වෙන සියලු‍ පුද්ගලයන්ට තරාතිරම නොබලා දඬුවම් පැමිණවීමට ඒ ඒ දෙපාර්තමේන්තුවල බලධාරීන් වගබලා ගැනීම ද අවශ්‍යය.

(***)