IMG-LOGO

2025 ජුලි මස 19 වන සෙනසුරාදා


මිථ්‍යාව වපුරා ජනතාව සූරාකන බඩගෝස්තරවාදියෝ

විද්‍යාව කෙතරම් ඉහළට දියුණු වුවද මිථ්‍යාවට තවමත් වැඩි ඉඩකඩක් තිබේ. යම් අයකු අසනීප වූ විට වෛද්‍ය ප්‍රතිකාර සඳහා යොමු නොවී විවිධ ගුරුකම්, තොවිල් නැටීම් ආදියෙන් ලෙඩ රෝග සුවපත් කර ගැනීමට යොමුවන නොදියුණු ජන කොටස් අප අතර තවමත් සිටිති. යකැදුරන්ගේ ලිංගික අතවරවලට ලක්වීම් පමණක් නොව විවිධ හේතු මත ජීවිත අහිමිවීමේ  අනුවේදනීය සිදුවීම් කොතෙක් වාර්තා වුවද ඒවාට යොමුවන්නෝ හිඟ නොවෙති. නිදන් පිළිබඳ මිථ්‍යා විශ්වාසය ද එසේමය.

අප පුවත්පත ඉකුත්දා වාර්තා කළ ප්‍රවෘත්තියකින් කියැවුණේ කඩවත, සූරියපාළුව ප්‍රදේශයේ දේවාලයක් පවත්වාගෙන යමින් පුද්ගලයන් රවටා ඔවුන්ගේ ඉඩම්වල නිදන් තිබෙන බව පවසා රුපියල් ලක්ෂ 22ක මුදලක් වංචා කළ බව කියන කපුවන් තිදෙනකු ඇතුළු නව දෙනකු කඩවත පොලිසිය මගින් අත්අඩංගුවට ගත් බවය. මෙම පිරිස් එම දේවාලයේ පූජාවක් පවත්වමින් සිටියදී අත්අඩංගුවට ගෙන ඇති අතර එම පිරිස් අතර කාන්තාවක ද සිටින බව අප ප්‍රවෘත්තියේ වැඩිදුරටත්  සඳහන්ය.

ඕනෑම ආගමක්, දහමක් විශ්වාසයක් ඇදහීමට ඕනෑම අයකුට අයිතියක් තිබේ. එහෙත් එය ඔවුන්ගේ විනාශයට හේතු වන්නේ නම් එයට එරෙහිවීමේ අයිතියක් ශිෂ්ට සම්පන්න සමාජයට තිබේ. මිථ්‍යාව වපුරා සිය බඩගෝස්තරය සොයාගන්නා ජාවාරම්කරුවන් සමාජයට සිදු කරන්නේ අතිමහත් විනාශයකි. සොයා බැලීමකින් තොරව තම පෞද්ගලික වාසිය තකා එම මිථ්‍යාව කරගසාගෙන යන්නෝ විනාශය තමන් කරා ළඟාකර ගනිති.

අප පුවත්පත වාර්තා කළ අන්දමට කඩවත, සූරියපාළුව ප්‍රදේශයේ පවත්වාගෙන යන දේවාලයකට පැමිණි පුද්ගලයකුගේ රාගම, තේවත්ත ප්‍රදේශයේ නිවෙසක් පරීක්ෂා කිරීමට අවශ්‍ය බව එහි කපුවා පවසා ඇති අතර එම ඉඩම පරික්ෂා කළ කපුවා ඉඩමේ නිදන් තිබෙන බව පවසා ඇත. සැකකරුවන් පසුව රත්නපුර ප්‍රදේශයෙන් අජීවි මැණික් ගල් රැගෙන විත් ඒවා ව්‍යාජ ලෙස සැකසූ පාෂාණවලට ඔබ්බවා පුරාවිද්‍යාත්මක වටිනාකමින් යුත් නිදන් වස්තු ඉඩම් තිබූ බව පවසමින් ඉඩම් හිමියා රවටා මුදල් වංචාව සිදුකර තිබේ.

මෙය කියවන ඔබට මෙවැනි වංචාවලට අහුවෙන මිනිසුන්ගේ ඔළු විශේෂ පරීක්ෂාවට ලක් කළ යුතු යැයි සිතෙනු නො අනුමානය. එමෙන්ම මෙබඳු වංචනිකයන්ට මිනිසුන් ගොදුරු වන්නේ වංචනිකයන් ගේ දක්ෂතාවට නොව වංචනිකයන්ට ගොදුරුවන පුද්ගලයන්ගේ දුර්වලතාවටය. එම මෝඩකම්වලට බෙහෙත් නැතැයි කීව ද පෙර අත්දැකීම් තමන්ට නොවූව ද සමාජයෙන් වාර්තාවන සිදුවීම් ආශ්‍රයෙන් යථාර්ථය තේරුම් ගැනීමට අසීරු නොවේ.

නිදන් පිළිබඳ මිථ්‍යාව ඇතැම් කොටස් තුළ බරපතළ ලෙස මුල් බැස තිබේ. කිසිදු විද්‍යාත්මක පදනමක් නොමැති වුවද තරාතිරම් බේදයකින් තොරව සමාජයේ විවිධ පිරිස් මෙම මිථ්‍යාවට ගොදුරුවී සිටිති.  ආරක්ෂක අංශවල ඉහළ නිලයන් දරන සමහර පුද්ගලයන් පවා නිදන් හැරීමට ගොස් පොලිස් අත්අඩංගුවට පත්වූ පුවත් පසුගිය සමයේ බහුලව වාර්තා විය.

 සොයා බලා විමසීමකින් තොරව ඕනෑම දෙයක් ඉස් මුදුනින් පිළිගෙන සියලු සේසත අහිමි කරගත් සිදුවීම් නිවැරැදිව කියවාගත හොත් යාගහෝම ආදියට යොමුවී වටිනා ජීවිත අහිමි කර ගත් අනුවේදනීය සිදුවීම එයට හිමි නිසි බරින්  කියවා තේරුම්ගතහොත් මෙම මිථ්‍යාව නමැති සැහැසි ග්‍රහණයෙන් මිදිය හැකිවනු ඇත. නොඑසේනම් මිල මුදලින්, දේපළවලින්, ජීවිතවලින් වන්දිගෙවීමට සිදුවන්නේ තමන්ට ම ය.

(***)



අදහස් (0)

මිථ්‍යාව වපුරා ජනතාව සූරාකන බඩගෝස්තරවාදියෝ

ඔබේ අදහස් එවන්න

 

 
 

මේවාටත් කැමතිවනු ඇති

අවැසි පවුල්වල දරුවන්ගේ ජීවිත රැක දෙන නොමිලේ සිදු කරන හෘද සැත්කම්. 2025 ජුලි මස 15 392 0
අවැසි පවුල්වල දරුවන්ගේ ජීවිත රැක දෙන නොමිලේ සිදු කරන හෘද සැත්කම්.

ඔබේ දරුවාට සංජානනය වන හෘද දෝෂයක් (CHD) තිබේ නම් සහ ඔබට ප්‍රතිකාර සඳහා මුදල් වැය කිරීමට නොහැකි නම්, අපි ඔබේ දරුවා වෙනුවෙන් ඒ මහැඟි සත්කාරය ඉටු කර දීමට කැප වී

පාසල් දරුවන්ට හිස්වැසුම් බෙදා දීම 2025 ජුලි මස 14 550 0
පාසල් දරුවන්ට හිස්වැසුම් බෙදා දීම

ශ්‍රී ලංකාවේ පැරණිතම සහ විශාලතම මෝටර් රථ සංවිධානය වන ලංකා ඔටෝමොබයිල් සංගමය (AAC), ’’මෝටර් රථ හිමියන්ගේ හඬ’’ සහ ’’මෝටර් රථ හවුල්කරු’’ ලෙස ප්‍රසිද්ධය. රට තු

සියපත ෆිනෑන්ස් 54 වැනි ශාඛාව ඓතිහාසික කඩුවෙල පුරවරය 2025 ජුලි මස 14 230 0
සියපත ෆිනෑන්ස් 54 වැනි ශාඛාව ඓතිහාසික කඩුවෙල පුරවරය

ශ්‍රී ලංකාවේ ප්‍රමුඛතම මූල්‍ය සමාගමක් වන සියපත ෆිනෑන්ස් පීඑල්සී සිය දීප ව්‍යාප්ත ශාඛා ජාලයේ 54 වැනි ශාඛාව පසුගියදා කඩුවෙල නගරයේදී විවෘත කෙරිණ.

Our Group Site