මාවරල – පී.එස්. මද්දුමගේ

මිය ගිය රෝගියකුගේ, දේහය රැගෙන ඒමට අවමංගල රථයක් ගාල්ල කරාපිටිය රෝහලට රැගෙන ගොස් හිස් අතින් පැමිණි පිරිසක් ගැන දකුණේ ගමකින් අසන්නට ලැබිණි..
සිද්ධිය මෙසේය.
මව ගාල්ල කරාපිටිය රෝහලේ නතර කර ප්‍රතිකාර ලබාදීමට කටයුතු කර තිබුණි. දුර බැහැරගෙවා ගෙන නිතර රෝහල වෙත යාමට නොහැකි නිසා සාත්තු සේවිකාවක මවට සාත්තුවට පත්කර සිටි අතර, ඇය වාට්ටුවේ සිටින රෝගීන් දෙදෙනකු සඳහා සාත්තු කිරීම බාරව සිටියාය.
පසුගිය දිනක, සාත්තුවට සිටි කාන්තාව විසින් මෙම මවගේ පුතකුට දුරකථන පණිවුඩයක් දී, මව මියගිය බව දැනුම් දුන්නාය.
පුතා තම සහෝදරයන්ට සහ නෑදෑයන්ට මව මිය ගොස් ඇති බව දන්වා මෘත දේහය ගෙන ඒම සඳහා, පිරිසක් ප්‍රදේශයේ මල් ශාලාවකින් අවමංගල රථයක්ද රැගෙන ගාල්ල කරාපිටිය රෝහලට ගියෝය.

රෝහලේ වාට්ටුවට ගොස් මවගේ මෘත දේහය ගැන සොයා බැලූ ඔවුනට ලැබුනේ පුදුම සහගත තොරතුරුය. වාට්ටුවේ මව සිටි ඇඳ අසලට ගිය මෙම පිරිසට මව ජීවතුන් අතර සිටින බව දැක ගන්නට ලැබීමෙන්, පැවැති වේදනාව තුරන් වී සතුටට පත්වූහ.
සිදුවී ඇති දේ ගැන සොයා බැලීමේදී, සාත්තුවට සිටි කාන්තාවට මියගිය රෝගියාගේ බාරකරුවන්ගේ සහ ජීවතුන් අතර සිටි රෝගියාගේ බාරකරුවන්ගේ දුරකථන අංක මාරුවී පණිවිඩය දීමෙන් මෙම අලකලංචියට මුහුණ දීමට සිදුවූ බව තේරුම් ගත් පිරිස, පත්වූ අපහසුතාව හා අනවශ්‍ය වියදම පිළිබඳව සාත්තු සේවිකාවට දොස් පවරා, රෝගියාව වගකීමෙන් බලාගත යුතු බවට තරයේ අවවාද කර ආපසු ගමට ඒමට පිටත් වූයේ මවට සහ ඥාතියාට සුවය පතා ආශිර්වාද කරමිනි.