කැලණිය ලාල් එස්. කුමාර

ඡායාරූප ශාලා හිමියකුගේ වැරැද්දක් නිසා තරුණියකට සිදුවෙන්නට ගිය ඇබැද්දියක් පිළිබඳ කොළඹට නුදුරු ප්‍රදේශයකින් පසුගියදා අසන්නට ලැබුණි.
සිද්ධිය මෙසේය. 
මෙම සිද්ධියට සම්බන්ධ තරුණිය පෞද්ගලික ආයතනයක සේවය කළාය. ආයතනයේ හැඳුනුම්පතක් සකස් කිරීම සඳහා ආයතනයේ පාලනාධිකාරිය විසින් දින දෙකක් සේවකයන්ට දන්වා තිබිණි. කෙසේ හෝ මෙම සිද්ධියට සම්බන්ධ තරුණියට එම දින දෙකේම සේවයට යාමට නොහැකි විය. ඊළඟ සතියේ මෙම තරුණිය සේවයට ගිය අවස්ථාවේදී පාලනාධිකාරිය විසින් දන්වා සිටියේ ඇයගේ සේයාරූ දෙකක් ලබාදෙන ලෙසයි. 

ඒ අනුව ඇය පෞද්ගලික ඡායාරූප ශාලාවකට ගොස් කාරණය පවසා සිටියාය. ඡායාරූප හතරක් ලබාදෙන අතර ඒ සඳහා රුපියල් 400ක් ගෙවන ලෙස ඇයට දැන්වීය. ඒ අනුව මුදල් ගෙවා කැමරාවට මුහුණ දුන් ඇයට පසුදින පැමිණ එම සේයාරූ ලබා ගෙනයෑමට පැමිණෙන ලෙස ඡායාරූප ශාලා හිමියා දැන්වීය. 
පසුදින උදෑසන සේවයට යන ගමන් ඇය ඡායාරූප ශාලාවට ගොස් ඡායාරූප ලබාගෙන කඩිමුඩියේ සේවයට ගියාය.
 එහි ඡායාරූප හතරක් ඇති බව ඡායාරූප ශාලා හිමියා ඇයට දැන් විය. ආයතනයට ගිය ඇය ලියුම් කවරයේ තිබූ සේයාරූ දෙකක් ආයතනයට ලබා දුන්නාය. ඉතිරි සේයාරූ දෙක මුදල් පසුම්බියේ තබා ගත්තාය. 
 සති අන්තයේ ඇය තම ආදරබර පෙම්වතා හමුවූවාය. ඔහු සමග පෙම් බස් දොඩමින් සිට පසුව ආපනශාලාවට ගියේ තම පෙම්වතාගේ ආරාධනාවකට අනුවයි. එහිදී ආහාර ගැනීමෙන් පසුව තම පෙම්වතා මුදල් ගෙවීමට සැරසෙන අවස්ථාවේදී ඇය තම මුදල් පසුම්බිය විවෘත කර මුදල් ගෙවීමට ඉදිරිපත් වූවාය. එහිදී ඔහු එය ප්‍රතික්ෂේප කළත් ඇය මුදල් ගෙවීමට ඉදිරිපත් වීම නිසා ඔහු ඇයගේ මුදල් පසුම්බිය ලබා ගැනීමට කටයුතු කිරීම නිසා මුදල් පසුම්බිය බිම වැටී එහි තිබූ දේ විසිරී ගියේය. 
එහි තිබූ රිසිට් පත් අතර පෙර දින තමා ගත් ඡායාරූපවලින් දෙකක් ඉතිරි වී තිබූ අතර, එයද බිම වැටී තිබුණි. ඔහු එය අහුලා ගත්තේය. එම පින්තුර දෙකෙන් එක් පින්තූරයක් තරුණයකුගේ විය. එහිදී ඔහු හා ඇය අතර කතාබහකට මගපෑදුණි. ඇයටත් මෙය ප්‍රහේලිකාවක් විය. කරුණු අවබෝධ කරගත් ඇය සිද්ධිය පිළිබඳව තරුණයාට කරුණු පැහැදිලි කර දුන් නමුත් ඔහු තුළ සැකයක් ඇතිවිය. 
අන්තිමේදී මේ පිළිබඳව ඡායාරූප ශාලා හිමියාගෙන් විමසීමට දෙදෙනාම එම ඡායාරූප  ශාලාවට ගියහ. 
සිද්ධිය පිළිබඳ ඡායාරූප ශාලා හිමියා ඔවුන්ගෙන් සමාව අයැද සිටියේය.