(මීරිගම විශේෂ පුෂ්පකුමාර මල්ලවආරච්චි)
තමන්ගේ ළඟම මිතුරා කොරෝනා ආසාදිත බව දැනගත් වහාම කාඩ් කුට්ටමක් ගෙන්වා ගන්නට සැරසුණු තරුණයකු පිළිබඳව පසුගියදා බස්නාහිර පළාතේ ඇති ගම්මානයකින් වාර්තා විය. 

එකට කා බී හැදුණු වැඩුණු තරුණ පිරිසකි. මේ කණ්ඩායම සිවු දෙනෙකි. දෙපළක් ආරක්ෂක අංශයක සේවය කරති. ඉකුත්දා රටේම අවධානයට ලක්වුණු ස්ථානයක ආරක්ෂක අංශ සාමාජිකයෝ දෙපළ රාජකාරියේ යෙදී සිටියහ. ඔවුනගේ කණ්ඩායමේ එක් අයකුද මේ ස්ථානයට ආයේ ඔවුන් හා කල්ගත කරන අදහසිනි. මේ තිදෙනා තමන්ගේ කල්ලියේ වැඩකිඩ ගැන කතා බහ කරමින් සිටියහ. 

මේ අතර ආරක්ෂක අංශ සාමාජිකයකුට අනෙක් කුළුපග මිතුරාගෙන් ඇමතුමක් ලැබිණි. එයින් කියවුණේ මිතුරා සේවා ස්ථානයේදී සිදු කෙරුණු පරීක්ෂණයකදී කොරෝනා ආසාදිත බව හෙළිවී ඇති බවයි. මේ පණිවිඩය තමන් සමග සිටි සෙසු දෙදෙනාටම දැන්වීමට ආරක්ෂක අංශ සාමාජිකයා කටයුතු කළේය. 

අනෙක් මිතුරා මේ බව දැන ගැනීමත් සමග මහත්සේ කලබලයට පත්විය. ඔහු නිවසට මෙන්ම තවත් හිතමිතුරන්ට හා සේවය කරන ස්ථානයට ඇමතුම් ගන්නා බව ආරක්ෂක අංශයේ මිතුරන්ට දැකිය හැකි විය. ඔහු සියලු දෙනාට දැන්වූයේ තමන් ඇතුළු සිවු දෙනා කුළුපග මිතුරන් බවයි. ඒ නිසා සෙසු තිදෙනාටද කොරෝනා ආසාදිත වී ඇතැයි ඔහු සැක කළේය. 

ආරක්ෂක අංශ සාමාජික දෙපළ ඔහුට කරුණු කාරණා කීහ. මේ රෝගය හිතවතකු වූ පලියටම නොවැළඳෙන බව මිතුරාට දැන්වූහ. ඔහු ඒ බව පිළිගන්නට මැලිවූයේය. ගජ මිතුරන් වුවත් මේ සිව් දෙනා මසකින් පමණ එකට හමු නොවූ බැවින් වැඩක් වූයේ නැත. 

මම ඉක්මනට කඩේට ගිහින් කාඩ් කුට්ටමක් ගේන්නම්. අපි හතර දෙනාට නිරෝධායනය වන ගමන් සෙල්ලම් කරන්න පුළුවන් ඔහු කීවේය. ආරක්ෂක අංශයේ මිතුරා මහ හඬින් සිනාසුණේය. මචං අපි හතර දෙනා කොරෝනා වලින් මැරුණාම කාඩ් ගහන්නේ කොහොමදැයි ඇසීය. මේ මෝඩ කතාව අපි හතර දෙනා විතරක් දැන ගත්තාම ඇතියි ආරක්ෂක අංශ සාමාජිකයකු පැවසීමෙන් පසු පසුබෑමට ලක්වූ මිතුරා දැඩි කල්පනාවේ නිමග්නව සිටිනු ඒ අසල රැඳී සිටි කෙනකු දුටු හෙයින් මේ කතාව රහසක් කර ගන්නට හැකි නොවීය.