(කලවාන උපේන්ද්‍ර ප්‍රියංකර ජාතුංගම)
බීමතින් සිටි මිතුරන් දෙදෙනකු මාරුවෙන් මාරුවට රෑ එළිවෙනතුරු දෙදෙනාගේ නිවෙස්වලට සක්මනේ ගිය සිද්ධියක් ගම්බද ප්‍රදේශයකින් වාර්තා වේ.

සිද්ධිය මෙසේය.

ඔහු වඩු කර්මාන්තයේ යෙදෙන අතර, ඔහුගේ මිතුරා ඔහුගේ අත්උදව්වට සිටින්නේය. ඔවුන් වැඩ අවසන් කර දිනපතා මත්පැන් පානය කරන අතර, වේලාසනින් මත්පැන් පානය කර නිවසට යන්නේ හොල්මන්වලට ඇති බය නිසාය.

දෙදෙනා අධ්‍යාපනයක් ලබා නැති අතර, ගමේ අය පවසන්නේ නෝන්ජල් පුද්ගලයන් දෙදෙනකු බවය. සිය මිතුරාගේ නිවසට යාමට ඇත්තේ කනත්තක් අසලින් නිසා ඔහු රාත්‍රී ගමන් යන්නේ නැති අතර. මොනම හේතුවක් නිසාවත් රාත්‍රියේ ගෙදරින් පිට වන්නේ ද නැත. මෙදින ඔවුන් මත්පැන් පානය කර ඇති අතර, වෙරි මතින් සූර් වූ නිසා ඔවුන්ට කාලය ගත වන බවක් වැටහී නැත. රෑ බෝ වූ නිසා මිතුරා පවසා ඇත්තේ තමන්ට කෙසේවත් තනිවම ගෙදර යාමට නොහැකි බවය.

පසුව ඔහු මිතුරා නිවසට ඇරලවීමට ගොස් ඇති අතර, ඔහු මිතුරාට පවසා ඇත්තේ තමන්ට ද නැවත යාමට බිය බවත්, තමන් මගට හෝ රැගෙන යන ලෙසත්ය. මිතුරා පිළිබඳව දුක සිතුණ ඔහු නැවත මගට රැගෙන ගිය විට මිතුරා පවසා ඇත්තේ තමන්ට නැවත තනියම ගෙදර යා නොහැකි බවය.

කෙසේ වෙතත් මිතුරන් දෙදෙනා මාරුවෙන් මාරුවට දෙදෙනාගේම නිවෙස්වලට සක්මන් කර ඇත. වෙරි හිඳී අවසන් වන විට පාන්දර වී තිබේ.

එදින නිවාඩු දැමූ මිතුරන් දෙදෙනා දහවල් නින්දට වැටී ඇත්තේ යළි කිසි දිනෙක රාත්‍රියේ මත්පැන් පානය නොකරන බවට එකිනෙකාට පොරොන්දු වෙමිනි.