(වියලුව වාර්තාකරු)
 සේවා මුර ක්‍රමයට පැය විසිහතර පුරා ක්‍රියාත්මකවන ආයතනයකි. මහල් කීපයකින් යුත් ගොඩනැගිල්ලේ ඉහළ මාලයක ඉඩ කඩ ඇති කාමරයක් වෙන් කර තිබුණේ එම කොටසේ සේවය කරන ස්ත්‍රී පුරුෂ දෙපාර්ශ්වයටම ආහාර ගැනීමට හා සනීපාරක්‍ෂක කටයුතු වෙනුවෙනි.

 මෙම කටයුතුවලට අමතරව ආයතනයේ පිරිමින් මෙහි විවේක ගැනීමත්, ඇතැම් විට හීන් අඩියක් ගසා ඇඟ රත්කර ගැනීමටත් පුරුදු වී සිටියේ එම කාමරය ඒ තරමටම එබඳු කටයුතුවලට කදිමට ගැළපුණු නිසාය. කරුණු කාරණා ඒ අයුරින් සිදුවුවත් එහි පැමිණෙන කාන්තා පාර්ශ්වයේ ඇතැමුන්ගෙන් ඊට එල්ල වූයේ දැඩි විරෝධතාවකි.

 එහෙත් ඉන් කලබල නොවූ පිරිමින් කීපදෙනකු පසුගිය දිනෙක ඊට අපූරු උපායක් යෙදූහ. හිටිහැටියේම කිසියම් අවශ්‍යතාවක් සඳහා පෙර කී කාමරයට මැදියම් රැයේ ගිය තරුණයකු මොහොතක් ගත වෙද්දී හූ කියාගෙන පහත මාලය වෙත දිව ආයේ ඉහින් කනින් දහඩිය ද පෙරාගෙනය.

රාත්‍රී සේවයේ නිරතව සිටි කාන්තාවන් කීපදෙනකු ළඟට හූ හඬ නගමින් දිව ආ ඔහු ඔවුන් ඉදිරියේ කපාලූ කෙසෙල් ගසක් සේ ඇද වැටුණේ කලින් කතිකා කරගත් සැලසුම අකුරටම ක්‍රියාවට නංවමිනි.

 විනාඩි කීපයක් යන තෙක් දැඩි භීතියකින් පසුවන බව පෙන්වූ තරුණයා, පිරිමි පාර්ශ්වයේ ඇප උපස්ථාන හමුවේ දෑස් විවර කරමින් කියා සිටියේ මාස කීපයකට පෙර මියගිය එම ආයතනයේම සේවකයකු තමුන් ඉහළ මාලයේ කාමරයට යනවිට එහි ඇඳක හාන්සි වී සිටිනු  දුටු බවකි.

 තරුණයාගේ කතාව ඇසූ ආයතනයේ කාන්තා පිරිස පමණක් නොව ඇතැම් පිරිමින් ද රෑ බෝ වූ වහාම අදාළ කාමරයට ගොස් තමුන් සතුව තිබූ රෙදිපිළි ඇතුළු සියල්ලක්ම රැගෙන කාමරයෙන් පිටතට පැමිණියේ යළිත් එම කාමරයට කිසි දිනෙක නොඑන බව එකිනෙකාට කියා ගනිමිනි.