පොසොන් පොහොයදා රජරට කලාඔය ප්‍රදේශයේ දහවල් පැවැති ආහාර දන්සලක මුළුතැන්ගෙට කඩවැදුණු රිළවකු එහි වැඩ කරමින් සිටි කාන්තාවකට අයත් මුදල්, ජංගම දුරකතනයක් ඇතුළු වටිනා කියන දෑ අඩංගු අත් බෑගයක් රැගෙන ඒ ආසන්නයේ රූස්ස ගසක් මුදුනට පලාගොස් සිටියදී එය ආපසු ලබා ගැනීම සඳහා රිළවා රැගෙන ගිය බෑගය තුළ තිබූ ජංගම දුරකතනයට ඇමතුමක් ගැනීමට සිදුවූ පුවතක් වාර්තා විය.
වාර්ෂිකව පොසොන් පොහෝදාට පැවැත්වෙන මෙම ආහාර දන්සල සඳහා ප්‍රදේශයේ විශාල පිරිසකගේ දායකත්වය ලැබෙන අතර ඒ අනුව එහි මුළුතැන්ගේ වැඩකටයුතු සඳහා පැමිණ සිටි වැඩිහිටි කාන්තාවකට අයත් අත් බෑගය අසල තැනක රඳවා තිබියදී මෙසේ රිළවා රැගෙන පලාගොස් ඇත.

එම බෑගය තුළ ජංගම දුරකතනයක්, රුපියල් දහසකට අධික මුදල්, බැංකු ගිණුම් පොත්, නිවසේ යතුර, ඖෂධ, ජාතික හැඳුනුම්පතක් ඇතුළු වටිනා කියන දෑ බොහොමයක් තිබී ඇත.
මෙහිදී ක්‍රියාත්මක වූ එහි සිටි කිහිපදෙනෙකු දන්සලේ වැඩ කටයුතුවලටද බාධාවක් නොවන පරිද්දෙන් වැඩේ ගොඩින් බේරා ගැනීම සඳහා උපක්‍රමශීලීව රිළවා සමග සුහද සම්බන්ධතාවක් ගොඩ නගා ගැනීමට උත්සාහ දරා ඇතත් එය ව්‍යර්ථ වී ඇත. ඒ කිසිවක් ගණන් නොගත් රිළවා තමා සතුකර ගත් බෑගය විවෘත කිරීමට උත්සාහ දරමින් සිටින අයුරු පිරිසට දැක ගැනීමට මෙහිදී හැකි විය.
මෙම දන්සලට යාබද රූස්ස ගස් මෙන්ම ජලාශයක්ද පිහිටා තිබීම නිසා බෑගයේ අවදානම පිළිබඳව මෙහෙයුමට සම්බන්ධ පිරිසේ අවධානයද වැඩි වී තිබුණි.
මේ අතර රිළවා රැගෙන ගිය බෑගය තුළ තමාගේ ජංගම දුරකතනයද ඇති බව එහි හිමිකාරිය වූ අදාළ කාන්තාව පවසා ඇත්තේ මේ අවස්ථාවේදීය.
පසුව ඒ අනුව ක්‍රියාත්මක වූ එහි සිටි අයකු අදාළ බෑගයේ හිමිකාරියගෙන් ඇගේ ජංගම දුරකතන අංකය අසා ඊට ඇමතුමක් ගෙන ඇත. එහිදී රිළවා යම් කලබලකාරී තත්වයක් පෙන්නුම්කර ඇතත් ඊට ප්‍රතිචාර ලෙස බෑගය අතඅරිනවා වෙනුවට ඒ වනවිටත් විවෘත කරමින් සිටි බෑගය තුළ ශබ්ද නගන දුරකතනය පමණක් බෑගයෙන් පිටතට රැගෙන බිමට දමා ඇත.
පසුව තවත් පැය බාගයක පමණ කාලයක් බෑගයත් රැගෙන ඒ ආසන්නයේ ගහෙන් ගහට පැන පැන සිටි රිළවා එම අතරතුර කාලය ඇතුළත බෑගය තුළ තිබූ බව කියන රුපියල් විස්සේ මුදල් නෝට්ටුවක් හැර බෑගය ඇතුළු එහි තිබූ අනෙකුත් සියලු‍ දෑ එකින් එක බිමට දමා ඇත.

කරුවලගස්වැව ජයරත්න වික්‍රමාරච්චි