කරන්දෙණිය එම්. සුසිල් ප්‍රියන්ත
අවශ්‍යතාවක් සඳහා නතර කර ගිය යතුරු පැදියේ ඇද්ද තෙල් යතුරු පැදි අයිතිකරුටම අලෙවි කළ දෙදෙනකු පිළිබද ගාලු‍ දිසාවේ නගරයකින් අසන්නට ලැබේ.

මේ දිනවල තෙල්වලට ඇත්තේ පුදුම ඉල්ලු‍මකි. මේ දෙදෙනා එදා මහ මග ජන ශුන්‍ය ස්ථානවල නතරකර තිබෙන යතුරු පැදියක තෙල් ඇද්දාහ. 

මේ දෙදෙනා  යතුරු පැදියෙන් තෙල් අදිනු දෙතුන් දෙනකු දැක්කත් මහා පාරේ තැනින් තැන බට දමා යතුරු පැදිවලින් තෙල් ඇදීම සාමාන්‍ය දෙයක් වී ඇති නිසා ඔවුහුද එය දැක්කා නොදක්කාමෙන් එතනින් ගියහ.

ඒ අතරතුර ඇද්ද තෙල් බෝතලයත් සමග ඔවුන් දෙදෙනාද එතැනින් වාෂ්පවී ගියේ ගණදෙවි නුවණද ප්‍රයෝජනයට ගෙනය.

ඔවුනට අවශ්‍යවී තිබුණේ ඇද්ද තෙල් බෝතලය කාහටවුවද කීයකට හරි විකුණා සල්ලි සොයා ගැනීමටය. ඒ අරමුණ ඔස්සේ ගිය ඔවුන් දෙදෙනා ඉදිරියට ආවේ යමක් කමක් ඇතැයි සිතිය හැකි අයෙකි. ‘‘හා අයියේ අපි පෝලිමේ ඉදලා බොහෝම අමාරුවෙන් තෙල් ටිකක් ගත්තා. අපි ඉතින් ගන්නේ පොඩි සම්තින් එකක් හොයා ගන්න. ඔයාට ඕනෑනම් මේ ගානට දෙන්නම්’’ කියා ඔවුන් පැවසුවේ තමන් අපේක්ෂා කළ තෙල් බෝතලයට වඩා අඩු මුදලකටය.  අතට පැමිණි වාසිය කොහෙත්ම අත හරින එක මෝඩකමක් යයි සිතු ඔහු තෙල් බෝතලය මිලදී ගත්තේය.

සිය යතුරු පැදිය ළඟට ගිය ඔහුට එහි තෙල් බටය ගලවා තිබෙනු දක්නට ලැබිණ. යතුරු පැදිය නතර කර තිබූ තැන තෙල් බිම වැටී තිබෙනුද ඔහුට දක්නට ලැබුණේය. 

සිදුවූදේ තේරුම් ගැනීමට වැඩිවෙලාවක් ගත නොවූ ඔහුට යතුරු පැදිය යළි සක්‍රිය කිරීමට හැකිවී ඇත්තේ සිය යතුරු පැදියෙන් ඇද මිලදී ගත් තෙල් දැම්මායින් පසුවය.