පවතින මිලටත් වඩා වැඩි මිලකට ගම්මිරිස් ගන්නවා කියා යතුරු පැදියෙන් ගමට පැමිණි වෙළෙන්දාට අලෙවි කළ කිලෝ දහයක ගම්මිරිස් ගෝනිය හිටි ගමන් කිලෝ හතක් බවට පත්වෙලා. හොර තරාදියක් අරන් බඩු ගන්න ගමට පැමිණි වෙළෙන්දාට ගැමි කත දෙන්නට ගිය කොසු ප්‍රහාරය හමුවේ ආපු පාරත් අමතකව ගිය පුවතක් පස්දුන් කෝරළයේ ගම්මානයකින් වාර්තාවේ.

මේ දිනවල ගම්මිරිස් සඳහා තරමක ඉහළ මිලක් පවතින නිසා ගැමි කාන්තාවක් තම ඉඩමේ තිබූ ගම්මිරිස් අස්වැන්න නෙළා වේළා ගෙදර තිබූ තේ දළු කිරන තරාදියෙන් කිරා, කිලෝ 10කටත් වඩා වැඩි ප්‍රමාණයකින් යුත් ගෝනියක් වෙළෙඳපොළට ගෙන යන බලාපොරොත්තුවෙන් වෙන් කොට තිබිණි.

දිනක් යතුරුපැදියකින් පැමිණි වෙළෙන්දකු ගම්මිරිස් තිබේ නම් වෙළෙඳ පොළේ මිල වෙන්නේ කිලෝවක් රුපියල් 1800ක් බවත් තමා කිලෝවට රුපියල් 2000, ගණනේ ගෙවන බවට පවසා ඇත.

වෙළෙන්දා කියූ පරිදි වෙළෙඳ පොළ මිල නිවැරදි නිසා කාන්තාව තම නිවසේ තිබූ ගම්මිරිස් ගෝනිය වෙළෙන්දාට ලබා දී තිබේ. වෙළෙන්දා ගෝනිය ඔහුගේ තරාදියෙන් කිරා බලා කාන්තාවට රුපියල් 14000ක් ලබාදී ඇති අතර කාන්තාව ඇයි මේ මුදල් අඩුවෙන් කියා වෙළෙන්දාගෙන් විමසූ විට ඔහු පවසා ඇත්තේ ‘ඇයි නෝනා කිලෝ හතයිනෙ’ තිබ්බේ කියාය.

එවිට කාන්තාව මොනවා, ඔතන කිලෝ හතක් නෙවෙයි කිලෝ දහයකටත් වඩා වැඩියෙන් තිබෙනවා. අපි හැමදාම අපේ තේ දළු කිරන තරාදියෙන් කිරුවේ ඒක හරියටම හරි. මේකයි එහෙනම් වෙළෙඳ පොළේ මිලටත් වඩා වැඩියෙන් මිලට ගම්මිරිස් ගන්නවා කියා මාව රවටන්න හැදුවේ. හොඳ හිතින් හොර තරාදියත් අරන් බහිනවා දොට්ට කියමින් එම කාන්තාව වෙළෙන්ඳාට කොසු පහරක් එල්ල කළාය.

බුලත්සිංහල ලක්මි කුඩලිගම