ආයතනයේ හිමිකරු තමාගේ ඥාතියකු යැයි  කියමින්  නිලධාරීන්ට  හා සේවකයින්ට  හයි  පාට් පෙන්වමින් සිටි පොරකට හදිසියේම ඉහළ  නිලයක්  හිමිවී පුටුවේ වාඩිවූ පළමු දිනයේම සේවකයින් අතර  නෝන්ඩි වී ගිය පුවතක් ගැන දකුණු පළාතේ නගරයකින් පසුගියදා අසන්නට ලැබුණි.
මෙය පොල් කර්මාන්තය ආශ්‍රිත වැඩ බිමකි. එහි නිලධාරීන් ඇතුළු  සේවක  පිරිස 60දෙනෙක් පමණ වෙති. ප්‍රදේශයේ පදිංචිකරුවන් මෙන්ම  වෙන පළාත්වල අයද එහි සේවය කරති.
මෙහි පිරිස් කළමනාකරණය භාර  සහාය විධායක නිලධාරියාගේ  හැසිරීම් රටාව හේතුවෙන් ඔහු සිටියේ ආයනයේ සියලු‍ දෙනාගේ  පිළිකුලට භාජනය වී ය. අගනුවර  වෙසෙන ආයතනයේ හිමිකරු  ඔහුගේ ළඟම ඥාතියකු යැයි පවසමින් ඔහු  කටයුතු කරන  නිසා අසාධාරණයක්   සිදුවුවද  රස්සාව   නැතිවෙතැයි  බියෙන් කිසිවකුත් ඔහු හා අරියාදුවට  යන්නේද   නැත.

මේ  අතර  හදිසියේම  මෙම  නිලධාරියාගේ  ඉහළ  නිලධාරියා  හෘදයාබාධයකින්  ආයතනය  තුළදීම  ජීවිතක්ෂයට  පත්වන්නේය. අගනුවර  ප්‍රදේශයේ  පැවති  ඔහුගේ  අවමඟුලට  සියලු‍   සේවකයින්  සහභාගි  වන  අතර  ඒ  වෙනුවෙන්  දිනක  නිවාඩුවක් ද  සියලු‍   සේවකයින්ට  ලැබී  තිබුණේය.
මියගිය  නිලධාරියාගේ  හිස්වූ  තනතුර  හිමිවන්නේ  සේවකයින්ගේ  පිළිකුලට  ලක්වෙමින්  සිටින  මේ  කනිෂ්ඨ  නිලධාරියාටය.
අවමංගල  නිවාඩුව  ලැබුණු  දිනට  පසුදා  අලු‍ත්  පුටුවේ  වාඩිවීමට  ඔහුට  වරම්  ලැබී  තිබුණේය. ‘‘හතේ  කොළේ”‍වෙලා  ඉන්න  කාලෙත්  ”‍තුරුම්පු  හේරා”‍ වගේ  හැසිරුණු  පුද්ගලයා  දැන්  “තුරුම්පු  ආසියා”‍ වී  සිටින  නිසා  සියලු‍  සේවකයෝ  තුස්නීම්භූතවී සිටියෝය.
මෙම  නිලධාරියා  අලු‍ත්  පුටුවේ  වාඩිවී  පැයක්  ඉක්ම යන්නට  මත්තෙන්   කනිෂ්ඨ  නිලධාරියෙක්  හා  සේවකයෝ  දෙදෙනෙක්.  ඔහුගේ කාමරය ඉදිරිපිට පෙනී සිටියහ. වීදුරු දොරෙන් ඔවුන්  දකින  මෙම නිලධාරියා ඔවුන්ට ඇතුළට එන්නැයි  සංඥා කරමින්ම දුරකතනයේ  රිසීවරය කනේ  තබාගත්තේය. ඇතුළට පැමිණි සේවකයන්ට පොඩ්ඩක්  ඉන්න යැයි  අතින් සංඥා කරමින් ඔහු දුරකතන ඇමතුමට පිළිතුරු  බැන්දාය.
‘‘තැන්කිව් අංකල්  තැන්කූ........අවුලක්  නෑ අංකල් වැඩ ටික හොඳින්  කෙරීගෙන  යනවා........නෑ නෑ අංකල් ශිෆ්මන්ට් එක ලබන  සතියෙ  නෙවෙයි  මම මේ සතියෙම  එවන්නං...........හරි  හරි අංකල් මං  එයා ගැන බලා ගන්නම්............අංකල් එයාලට කියන්න දැන් ඉන්නෙ  මිස්ට පීරිස් නෙවෙයි කියල.......ඕ කේ අංකල්.........චෙරියෝ.....බායි.
කතාව  හමාර කළ ඔහු රිසීවරය දුරකතනය මත තබමින්ම”‍බොස් සුබ  පැතුව උදේම.ඉතිං! මොකද? මේ මහත්වරු උදේ පාන්දරම”‍ යැයි විමසා  සිටියේය.”‍ නෑ සර් මේ ටෙලිෆෝන් එක දැන්  සතියක් තිස්සෙම වැඩ  කරන්නෙ නෑ. කේබල් එකේ පොඩි ඩැමේජ් එකක් තිබුණ. ඕඩර් කරපු  බඩු ඊයෙ ඇවිල්ල තිබුණ. අපි ආවෙ කේබල් එක මාරුකරන්න. සර්  පොඩ්ඩක්  නැගිට්ට නම් අපිට වැඩේ කරගන්න පහසුයි”‍කියමින්  කනිෂ්ඨ  නිලධාරියාට පැමිණි කාරණාව පැහැදිලි කළේය.
වචනයක්  හෝ නොදොඩා ඔහු දොර හැරගෙන පිටවී ගියේය.
එම සිද්ධියෙන් පසු ඔහු හා ලොක්කා අතර ඥාති සම්බන්ධයක්  නැති බව හෙළිවීම නිසා ඔහුගේ තිබූ  ඔළුවේ හුළං බැස ගොස් සාමාන්‍ය   තත්වයට පත්වූ බවත් එහි සේවකයෝ පවසති.   

පෝද්දල සරත් ආනන්ද ගමගේ