දකුණු පළාතේ ප්‍රධාන නගරයක ජනාකීර්ණ වීථියක සිය යතුරුපැදියෙන් ගමන් කරමින් සිටි ඔහුට හදිසියේ දක්නට ලැබුණේ වසර ගණනකට පෙර දැඩි හිතවතකුව සිට කාලයකින් හමුනොවූ මිතුරෙකි. ඔහු කලින් දැඩිව රෝගාතුරව සිටි බව ආරංචි වුවද ඒ පිළිබඳව ස්ථිර තොරතුරු නොදැන සිටි නිසා ඔහුට සංඥාවක් දෙමින් යතුරුපැදිය එතනම නවත්වා ඔහු හමුවට දිව ගියේය.


මිතුරා ද ඔහු දැකීමෙන් අපමණ සතුටට පත්ව අසල වූ අවන්හලකට ගොඩවූයේ තොරතුරු කතාබහ කරන අතරතුර තේ පැන් සංග්‍රහයක් ද භුක්ති විදීමටය.
කාලය ගත වී ගියත් ඔවුනට ඒ බව නොදැනුනි. පැය දෙකකට පමණ පසු මිතුරාගෙන් සමුගත් ඔහු යතුරුපැදිය නවතා ඇති ස්ථානයට ගියත් එය එතැන නොවීමෙන් ඔහුට තරු පෙනිණ.


යතුරුපැදිය අවට කිසිතැනක නොවූයෙන් පැමිණිල්ලක් දැමීමට පොලිසියට ගිය ඔහු ගේට්ටුවෙන් ඇතුළුවත්ම දුටුවේ වෙනත් යතුරුපැදි රැසක් මැද තම යතුරුපැදිය ද ඇති බවය.


එහි මුරට සිටි පොලිස් නිලධාරියාගෙන් මේ ගැන විමසූවිට ඔහු කීවේ මහ මග ප්‍රවාහන කටයුතුවලට අවහිර වන පරිදි නවතා තිබූ යතුරුපැදිය පොලිසියට ගෙනා බවත් දඩ මුදලක් ගෙවා එය ආපසු ගෙන යා හැකි බවත්ය.

(තිහගොඩ - උපසේන ලියනගම)